Bas prokýratýra
Júrgizilgen taldaý kórsetkendeı, jekelegen onlaın-platformalar tyıym salynǵan zattardy, sonyń ishinde búrkemelengen nemese «turmystyq» taýarlar keıpinde satýǵa áli de jol berip otyr. Mundaı tájirıbe azamattardyń ómiri men densaýlyǵyna tikeleı qaýip tóndiredi jáne marketpleıs ıeleri tarapynan baqylaýdyń jetkiliksizdigin aıǵaqtaıdy.
Sýyq qarýdyń kámeletke tolmaǵandar úshin qoljetimdiligi erekshe alańdaýshylyq týdyrady. Súzgiden ótkizý men buǵattaýdyń tıimdi tetikteriniń joqtyǵy jasóspirimderdiń zańsyz áreketterge tartylýyna jáne keıinnen olardyń qylmystyq jaýapkershilikke tartylýyna jaǵdaı jasaıdy.
Buǵan deıin memlekettik organdar men marketpleıs ákimshilikteri arasynda tyıym salynǵan ónimderdi ornalastyrýǵa jáne satýǵa jol bermeý týraly ýaǵdalastyqtarǵa qol jetkizilgeni atap ótildi. Soǵan qaramastan, keıbir platformalar ózderine alǵan mindettemelerdi elemeı keledi, bul jol berilmeıtin jaıt.
Máselen, Mádenıet jáne aqparat mınıstrliginiń Aqparat komıteti «Satu.kz» ınternet-dúkenin sýyq qarýdy jarnamalaǵany úshin Ákimshilik quqyq buzýshylyq týraly kodekstiń 455-baby boıynsha ákimshilik jaýapkershilikke tartty.
Osyǵan baılanysty onlaın-alań ıeleriniń jaýapkershiligin kúsheıtý, tyıym salynǵan taýarlardy súzgiden ótkizý men buǵattaýdyń tıimdi tetikterin engizý, sondaı-aq qosymsha profılaktıkalyq sharalar qabyldaý qajettiligi basa aıtyldy.
Bas kólik prokýratýrasy eskertedi: ańshylyq kásipshilikpen baılanysty jaǵdaılardy qospaǵanda, sýyq qarýdy zańsyz alyp júrý nemese ótkizý, sol sııaqty tıisti ruqsaty joq adamdarǵa qarý men oq-dárilerdi satý Qylmystyq kodekstiń 287-baby boıynsha qylmystyq jaýapkershilikke ákep soǵady.
Bul másele «Atameken» Astana qalasynyń óńirlik kásipkerler palatasynyń alańynda egjeı-tegjeıli talqylandy. Onda memlekettik jáne quqyq qorǵaý organdarynyń, sondaı-aq iri marketpleısterdiń qatysýymen vedomstvoaralyq keńes ótti.
Jıyn qorytyndysy boıynsha qaýipti jáne tyıym salynǵan ónimderdi onlaın-saýdadan shyǵarý, sondaı-aq qoǵamdyq qaýipsizdik máselelerinde bıznes pen memlekettiń biryńǵaı ustanymyn qalyptastyrý boıynsha naqty usynystar ázirlendi.
