Aksııa 23-31 jeltoqsan aralyǵynda ótip, elimizdiń barlyq óńirlerin qamtıdy. Oǵan SMALL, Magnum, Fermag, Anvar, Toimart, Dina, «Norma», «Dana» sııaqty shamamen 80 iri saýda jelisi, sondaı-aq birqatar óńirlik rıteılerler qatysyp otyr.
Saýda jáne ıntegrasııa mınıstrliginiń málimetinshe, bul bastama negizgi tutyný taýarlarynyń baǵasyn turaqtandyrýǵa, otandyq óndirýshilerdi qoldaýǵa jáne qazaqstandyq ónimderdiń halyq úshin qoljetimdiligin arttyrýǵa baǵyttalǵan. Buǵan deıin aksııa bıylǵy jyldyń qyrkúıek–qazan aılarynda ótken bolatyn.
«Bereke Fest» aıasyndaǵy baǵanyń tómendeýi saýda jelileri tarapynan saýda ústemeleriniń qysqartylýy, sondaı-aq deldaldardyń qatysýynsyz fermerler men saýda núkteleri arasynda tikeleı jetkizilimder jolǵa qoıylýy esebinen múmkin boldy. Nátıjesinde otandyq jáne ımporttyq taýarlar jeńildiktermen usynylýda. Aksııa assortımentine áleýmettik mańyzy bar azyq-túlik taýarlary kiredi.
Iri saýda jelilerinde aksııa kezeńinde qazaqstandyq óndirýshilerdiń ónimderi usynylatyn arnaıy promo-aımaqtar uıymdastyryldy. Negizgi nazar otandyq taýarlardy ilgeriletýge jáne saýda jelileri men jergilikti jetkizýshiler arasyndaǵy turaqty kooperasııany damytýǵa aýdarylǵan.
Aksııaǵa qatysatyn barlyq saýda núkteleri biryńǵaı stılde bezendirilgeni atap ótildi. Bul satyp alýshylardyń baǵdar alýyn jeńildetip, ónimniń qoljetimdiligi men jergilikti shyǵý tegine basa nazar aýdarady. Mınıstrlikte «Bereke Fest» aksııasyn ótkizý ishki suranysty yntalandyrýǵa jáne eldiń azyq-túlik qaýipsizdigin nyǵaıtýǵa da yqpal etetinin atap ótti.
