Taǵylymdy tárbıe saǵaty

Tárbıe saǵatyn 4-synyp jetekshisi Sholpan Moldaǵulova «aýyzsha jýrnal» formatynda ótkizdi. Jańa format «Táýelsizdik ońaı jolmen kelgen joq», «Baqytym bar úshinshi – Otan degen», «Táýel­siz Qazaqstan: Tarıh jáne taǵylym», «Táýelsizdik – balalar kózimen» jáne «Qazaqstannyń jeti keremetine saıahat» atty bes taqyrypqa bólingen.

Ashyq tárbıe saǵaty Mem­lekettik ánuranmen bastaldy. Odan keıin oqýshylarǵa «Táýelsizdik ońaı jolmen kelgen joq» atty taqyrypta beınerolık kórsetildi. Onda balalar azattyq jolynda kúresken bahadúr babalarymyzdyń erligimen birge el ıgiligi jolynda qyzmet etken aıtýly qaıratkerlerdiń eńbegi jaıynda mol maǵlumat aldy. Sondaı-aq sabaq barysynda oqýshylar óz ónerin de ortaǵa saldy. Máselen, «Baqytym bar úshinshi – Otan degen» bóliminde balalar Abaı atamyzdan bas­tap, Mirjaqyp Dýlatuly, Juban Moldaǵalıev, Muqaǵalı Maqataev, Farıza Oń­ǵarsynova sekildi kórnekti aqyndardyń Otan, týǵan jer týraly óleńderin mánerine keltirip, jatqa oqydy. Jas kúıshi Baǵdat Alshyn «Erturan» týyndysyn asqaqtata kúmbirletti. Al «Táýelsiz Qazaqstan: Tarıh jáne taǵylym» atty bóliminde synyp muǵalimi oqýshylarǵa egemendik alǵan jyldardan beri elimizde bolǵan eleýli oqıǵalarǵa qatysty tanymdyq suraqtar qoıyp, jetkinshekter oǵan naqty jaýap berdi. Qyzyqty sózjumbaqtardy sheshti. «Qazaq­stannyń jeti keremetine saıahat» bóliminde elimizdegi tabıǵaty ásem ólkelermen jaqyn tanys­ty. Ásirese olarǵa «Altyn-Emel», «Býrabaı» ulttyq tabıǵı parki, Bozjyra, Sharyn shatqaly, Burqanbulaq sarqyramasy jáne halqymyz erekshe qasıet tutatyn  Túrkistan qalasy týraly qundy aqparattar berildi.

Sonymen qatar tárbıe saǵa­ty aıasynda oqýshylardyń shyǵar­mashylyq qabiletin damytý maqsatynda «Táýelsizdik – balalar kózimen» atty sýret baıqaýy uıymdastyryldy. Baıqaýǵa balalar ózderi salǵan sýretterdi usyndy. Solardyń arasynan úzdik shyqqan jumystar «Eń áserli sýret», «Shyǵarmashylyq oı», «Eń kreatıvti jumys», «Eń áserli kompozısııa», «Ulttyq órnek kórinisi» sekildi atalymdarmen baǵalanyp, marapattaldy. Mazmundy is-shara sońynda jetkinshekter «Egemen elim – Qazaqstan!» atty ándi qosylyp keremet shyrqady. Sondaı-aq synyp jetekshisi tárbıe saǵatyna belsendi qatysqan barlyq oqý­shyǵa uly tulǵalarymyzdyń beı­nesi bederlengen tósbelgi tartý etti.

Sálıma TÁLIPBAIQYZY