Infografıkany jasaǵan – Záýresh SMAǴUL ,«EQ»
Oblystyq jumyspen qamtýdy úılestirý jáne áleýmettik baǵdarlamalar basqarmasy basshysynyń orynbasary Erkebulan Ábilqasymovtyń aıtýynsha, jańa jumys ornynyń 15 myńǵa jýyǵy – turaqty, qalǵany – ýaqytsha jumys oryndary. Sondaı-aq ulttyq jobalar men damý tujyrymdamalaryna sáıkes «Integrasııalyq jumys oryndaryn qurý» aqparattyq júıesinde 82 joba iske asyrylyp otyr. Bul jobanyń sheńberinde 2 342 adam jumyspen qamtylǵan.
«Jyl basynan beri 18 myńnan astam turǵyn jumysqa ornalasty. Onyń ishinde 4 myńnan astamy qoǵamdyq jumysqa tartyldy. 1 900-den astam jas «Jastar praktıkasy» jobasymen qamtyldy. «Kúmis jas» jobasy arqyly 1 500-ge jýyq egde jastaǵy jumyssyz eńbekke tartylyp, zeınetaqy jarnasyn tóleýge múmkindik jasaldy. Áleýmettik osal toptaǵy turǵyndarǵa da qoldaý kórsetildi. Olardyń arasynan 291 adam óz isin bastaýǵa qaıtarymsyz grantqa ıe boldy», deıdi ol.
Basqarmanyń bólim basshysy Gúlbolat Amanǵalıeva usynǵan derekke súıensek, jyl basynan beri 7 121 jas jumyspen qamtyldy. Taratyp aıtqanda, turaqty jumysqa 4 myńǵa jýyǵy, sýbsıdııalanatyn oryndarǵa 3 154 jas ornalasqan.
«Maýsym aıynan beri 33 jas qysqa merzimdi kýrsqa jiberildi. «Online skills» platformasy arqyly oqýǵa 729 jas tartylyp, 550-i sertıfıkat aldy. «Bastaý-bıznes» jobasymen 862 jas kásipkerlik negizderin meńgerý oqýlaryna qatysty. Onyń ishinde 500-ge jýyǵy sertıfıkat alyp, 71 jas jumysqa ornalasty. 43 jasqa memlekettik grant berildi», deıdi G.Amanǵalıeva.
Onyń málimetinshe, turmysy tómen toptaǵy 114 jas jeke kásibin bastaý maqsatynda 400 AEK kóleminde qaıtarymsyz grant qarjysyn alǵan. Sondaı-aq 13 500 jasqa kásibı baǵdarlaý qyzmeti kórsetilgen.
О́ńirde «Aýyl amanaty» baǵdarlamasymen kásibin keńeıtkender az emes. Sonyń qatarynda Qurmanǵazy aýdanynda jeke kásipkerlikpen aınalysyp júrgen Serik Sýjıkov te bar. Ol atalǵan baǵdarlamamen 8 mln 600 myń teńgege stomatologııaǵa arnalǵan zamanaýı qural-jabdyqtar satyp alǵan. Sóıtip, aýyl turǵyndaryna sapaly medısınalyq qyzmet kórsetýdi jandandyryp otyr.
«Baǵdarlama arqyly stomatologııa kabınetin jańartyp, zamanaýı jabdyqtar alýyma múmkindik týdy. Bul – aýyl turǵyndaryna sapaly, qoljetimdi qyzmet kórsetýge jasalǵan úlken qoldaý», deıdi S.Sýjıkov.
Mahambet aýdanyndaǵy «Islam-Alı» sharýa qojalyǵynyń jetekshisi Orazaly Talpanov ta «Aýyl amanaty» baǵdarlamasyna qatysypty. Oǵan atalǵan baǵdarlamamen 8 mln 540 myń teńge kólemindegi qarjy berilgen. Qojalyq jetekshisi bul qarjyǵa Qambar ata tólin satyp alyp, mal sanyn kóbeıtipti.
«Baǵdarlama biz sekildi aýyl kásipkerlerine tyń serpin berdi. О́zim sharýashylyǵymdy keńeıtýdi oılap júr edim. Osy maqsatta memlekettik baǵdarlama arqyly 17 bıe men 1 aıǵyr satyp alyp, jumysymdy júıeli júrgize bastadym», deıdi O.Talpanov.
Al Sáýle Asanǵalıevanyń nan-toqash ónimderin pisiretin shaǵyn naýbaıhanasy bar. Ol da «Aýyl amanaty» baǵdarlamasynyń ıgiligin kórip otyr.
«Maqsatym – turǵyndardy kúndelikti sapaly nan-toqash ónimderimen qamtý. Tutynýshy sapaly ónimdi qalaıdy. Sol turǵyda naýbaıhana jabdyqtaryn jańartý qajet edi. Baǵdarlama arqyly jeńildetilgen nesıege qol jetkizip, naýbaıhanaǵa qajetti qural-jabdyqtar satyp aldym. Endi tutynýshyǵa sapaly ári dámdi ónim usynamyz», deıdi S.Asanǵalıeva.
Atyraý oblysy
