ALMATYNYŃ EŃ SULÝ SÝBURQAǴY

Qazaqstan Respýblıkasynyń Tuńǵysh Prezıdenti atyndaǵy saıabaqta oryn tepti Atalmysh saıabaq – ońtústik astanadaǵy tabıǵattyń barlyq ǵajaby men HHI ǵasyrdyń ǵylym jetistikterin jınaǵan tamasha dendropark. Alataýdyń etegin endep jatqan dendropark osydan birneshe jyl buryn Elbasynyń bastamasymen boı kótergen bola­tyn. Elbasy sol kezde Almatynyń eń ásem bóligi ustaǵannyń qo­lynda, tistegenniń aýzynda ketpeı, qala turǵyndarynyń ortaq ıgiligine berý úshin osy saıabaqta óz qolymen alǵashqy kóshetterdi otyrǵyzǵan edi. Endi, mine, búginde bul saıabaq kún saıyn kórkeıip, álemniń ár túkpirinen ákelingen tamasha kóshetter japyraǵyn jaı­yp, almatylyqtardyń eń súıikti dem­alys ornyna aınalǵan. Dendroparkti ózge saıabaq­tar­dan daralaıtyn tustary kóp-aq. Munda ý-shý attraksıondar, basqa da oıyn-saýyq dýman joq. Taý bókterindegi múlgigen tynyshtyq pen tabıǵattyń tosyn sulýlyǵyn súıetinder osy arada serýendeıdi. San alýan gúlder men ásem da­raq­tardyń ózindik kórmesi sekildi den­droparkte jýyrda jeti sýbur­qaq­tyń eń bastysy saltanatty jaǵdaıda kókke shapshydy. Iаǵnı, Almatydaǵy eń úlken saıabaq eń sulý sýburqaqpen tolyqty. 19,5 metrge atqylaıtyn sý tamshylary sham jarqylymen túngi mezgilde tipti ásem. Sýburqaqtyń dıametri – 52 metr. Eger búginde qalada 120 shaqty sýburqaq bolsa, onyń 18-i qaıta jóndelgen. Al Tuńǵysh Prezıdent atyndaǵy saıabaqtaǵy eń basty sýburqaq mýzyka áýenimen, túrli-tústi shamdarmen  kómkerilgen. Sýburqaqtyń saltanatty iske qo­sylýyna kelgen qala ákimi Ah­met­jan Esimov atalmysh parkti za­ma­naǵa saı abattandyrý úshin ju­mys jalǵasa beretindigin, ony ju­maq­tyń bir pushpaǵyndaı etýde saıa­baqtyń ońtústik bóliginde ja­san­dy toǵan, aınalasynda bıiktigi 24 metr bolatyn kishigirim qyrat ja­saý jobalanǵanyn atady. Kele­shek­te 73 gektardy alyp jatqan saıa­baqtyń ortańǵy bóliginde ta­nymdyq sıpattaǵy nysandar boı kóterýi tıis. Onyń ishindegi klı­ma­trondarda – jabyq  oryndarda Jer shary­nyń ońtústik jáne sol­tústik bóli­gindegi tabıǵı flora kelýshilerdiń nazaryna usynylatyn bolady. Aınash ESALI, ALMATY. Sýretti túsirgen Bersinbek SÁRSENOV.