Sýret: pavlodarnews.kz
«Sheber asýy» – óńir ákiminiń arnaıy syılyǵy. Marapat alǵash ret tabystalyp otyr ári bul bilimimen, eńbegimen, talantymen, tabandylyǵymen kásibı sheberliktiń shegi joq ekenin dáleldegen jastardy yntalandyrýǵa baǵyttalǵan.
Oblys ákimi Asaıyn Baıhanov jeńimpazdardy quttyqtap, jyly lebizin bildirdi.
«О́zderińizge belgili, jumysshy mamandyqtary – el ekonomıkasynyń negizi. Búgin sizder – úzdik stýdentsizder, al erteń suranysqa ıe maman bolyp, óńirimizdiń tiregine aınalasyzdar. Aldaǵy ýaqytta da únemi damý kóshinde bolyp, jańa maqsattar qoıyp, Pavlodar oblysynyń atyn respýblıkalyq jáne halyqaralyq deńgeıde asqaqtata beresizder dep senemin. Sizderdiń kásibı biliktilikterińiz ben belsendi azamattyq ustanymdaryńyz Ertis-Baıan óńiriniń bolashaǵynyń berik irgetasy», dedi óńir basshysy.
Marapattalǵandardyń qatarynda Jaıaý Musa atyndaǵy Aqsý joǵary kópsalaly kolledjiniń stýdenti, «WorldSkills Kazakhstan – 2025» konkýrsynda «Elektrmontaj» quzyrettiligi boıynsha altyn medal ıegeri Maksım Sorozıdınov, Musahan Qanapııanov atyndaǵy joǵary kolledj stýdenti, volonter, «Qazaqstannyń 100 úzdik stýdenti» respýblıkalyq konkýrsynyń jeńimpazy Nazerke Qaıyrgeldınova, tehnologııalyq kolledj stýdenti, «WorldSkills Kazakhstan – 2025» konkýrsynda «Naýbaıhana isi» quzyrettiligi boıynsha kúmis júldeger, Máskeýde ótken «Kondıter. Detı» shoýynyń jartylaı fınalısi Meıram Asyljan bar.
Jalpy, bıyl «Sheber asýy» atalymy boıynsha oblys ákiminiń birjolǵy syılyǵymen kásibı sheberliktiń joǵary deńgeıin jáne damýǵa degen umtylysyn kórsetken óńir kolledjderiniń 30 stýdenti marapattaldy.
Pavlodar oblysy
