Aımaq basshysy órttiń shyǵý oshaǵyn, sebebin jáne shyǵyn kólemin anyqtaý úshin arnaıy komıssııa qurylǵanyn habarlady.
– Turǵyn úıge nysanaly tótenshe jaǵdaı jarııalandy. Ár páter boıynsha keltirilgen shyǵyn eseptelip, zań talaptaryna sáıkes qalpyna keltirý jumystary júrgiziledi. Zardap shekken turǵyndarǵa qajetti kómek kórsetiledi, – dedi oblys ákimi.
Qazirgi tańda merdigerler shatyr jabyndylaryn alyp, qalpyna keltirý jumystaryn bastap ketti. Páterlerdi jóndeý tıisti komıssııanyń naqtylaý, anyqtaý sharalarynan keıin júzege asady.
Oblys ákimi zerdeleý kommısııanyń jumysyna turǵyndardy da tartý qajettigin basa aıtyp, qala basshylyǵyna naqty tapsyrmalar júktedi. Sondaı-aq, turǵyndardy sabyrlyq tanytýǵa, saqtyq sharalaryn qatań saqtaýǵa shaqyrdy.
Eske sala keteıik, 2025 jylǵy 31 jeltoqsanda saǵat 22:18-de atalǵan turǵyn úıdiń balkonynan órt shyǵyp, jalyn shatyrǵa taraǵan.
Tótenshe jaǵdaılar departamentiniń kúshimen 100 adam, onyń ishinde 30 bala evakýasııalandy. Saǵat 00:13-te órt tolyq sóndirildi. Zardap shekkender joq.
Oqıǵa ornyna 62 adam jáne 22 tehnıka jumyldyryldy. Kópqabatty turǵyn úıdiń birqatar turǵyndary qonaqúıge ornalastyryldy.
Aımaq basshysynyń tapsyrmasyna sáıkes oqıǵa ornynda oblys ákiminiń orynbasary Altaı Áli men Taraz qalasynyń ákimi Baqytjan Orynbekov jumys júrgizip jatyr.
