Foto: Ashyq derekkóz
Vıse-mınıstrdiń aıtýynsha, 2025 jyldyń qorytyndysy boıynsha temirjol salasy rekordtyq kórsetkishke qol jetkizdi: tasymaldaý kólemi shamamen 318 mln tonnaǵa jetti. Al 2026 jyly bul kórsetkish 327 mln tonnany quraıdy dep boljanyp otyr. Tranzıttik tasymal salasynda jyl saıynǵy turaqty ósim 20% deńgeıinde saqtalyp keledi.
«Bıyl «Dostyq – Moıynty» jáne «Almaty aınalma joly» sııaqty iri jobalar aıaqtaldy, olardyń jalpy uzyndyǵy – 911 shaqyrym. Bul jeliniń ótkizý qabiletin 5 esege arttyrýǵa jáne tranzıttik tasymaldardy jedeldetýge múmkindik berdi», dedi Jánibek Taıjanov.
Vıse-mınıstr aldaǵy josparlarǵa da toqtalyp ótti:
- «Qyzyljar – Moıynty» jáne «Darbaza – Maqtaaral» ýchaskelerindegi strategııalyq jobalar aıaqtalady.
- «Altynkól – Jetigen» jáne «Beıneý – Mańǵystaý» baǵyttaryn jańartý jumystary júrgiziledi.
Temirjol qyzmetteriniń sapasyn jaqsartý úshin parkti aýqymdy túrde jańartý kózdelgen. 2026 jylǵa qaraı:
- 236 lokomotıv;
- 1,4 myńnan astam júk vagony;
- 191 zamanaýı jolaýshylar vagony jetkiziledi.
Sondaı-aq jol jóndeý jumystarynyń qarqyny da joǵary. 2025 jyly 1,5 myń shaqyrym jol jóndelse, 2026 jyly taǵy 1,6 myń shaqyrym joldy kúrdeli jóndeýden ótkizý josparlanǵan.
Transkaspıı halyqaralyq kólik baǵyty (THKB) men «Soltústik – Ońtústik» dálizderi halyqaralyq saýdadaǵy mańyzyn arttyra túspek. THKB aıasynda otandyq saýda floty 4 parommen tolyqtyrylyp, 2026 jyly konteınerler tasymaly 90 myń JPE-ge jetedi dep josparlanǵan.
Memleket basshysynyń tapsyrmasymen vokzaldardy jańǵyrtýdyń keshendi baǵdarlamasy júrip jatyr.
«Osylaısha, 2026 jyl Qazaqstannyń zamanaýı ári ornyqty, básekege qabiletti kólik júıesin qalyptastyratyn negizgi ınfraqurylymdyq jobalarynyń aıaqtalyp, is júzinde jemisin bere bastaǵan kezeńi bolady», dedi vıse-mınıstr.
