Ekonomıkalyq aımaqtar erkin damıdy

Keshe Ortalyq kommýnıkasııalar qyzmetinde «KAZNEX INVEST» AQ basqarma tóraǵasynyń orynbasary Almas Aıdarov elimizge kelip jatqan ınvestısııalarǵa qatysty baspasóz máslıhatyn ótkizdi. Arnaıy ekonomıkalyq aımaqtardyń qyzmeti jóninde áńgimelep, onda oryn alyp jatqan ózgerister týraly aıtty. Memleket basshysynyń sala­ǵa qatysty júktegen tapsyr­ma­­la­­ry­nyń oryndalý barysyn jet­­kizgen tóraǵa orynbasary eli­mizdi ındýstrııalandyrý baǵdar­lama­synyń júzege asyrylýyn baıandady. «Indýstrııalyq-ınnovasııalyq damýdyń mem­leket­tik baǵdarlamasynyń birin­shi besjyldyǵynda AEA ınfra­qurylymyna buǵan deıingi 9 jylmen salystyrǵan memlekettik ınvestısııa 2 esege kóp salyndy. Naqty sandarǵa súıenip aıtar bolsaq, bul ıgi iske 148,3 mlrd. teńge tartylypty. Mamandardyń sózine ılansaq, osynaý shara ınvestorlardyń belsendi áreket etýine óz áserin tıgizgen. Sóıtip, aldyńǵy 9 jylmen salystyrǵanda ınvestısııa 7,5 esege deıin kóp tartylyp, 336,1 mlrd. teńgeni qurady. Nátıjesinde óndiris kólemi 5 ese­ge ósip, 677,7 mlrd. teńgege jet­ti. Al jumys oryndarynyń sany 4,5 esege kóbeıip, 7433 adam turaqty jumyspen qamtyldy»,  dedi A.Aıdarov. Jalpy arnaıy ekonomıkalyq aımaqtardy damytý kezeń-keze­ńi­men júrip jatyr eken. Qazirgi kezde júzege asyrylǵan 126 jobanyń 111-i jobalyq qýattylyǵy bo­ıynsha 50 paıyzdan asyp úlgeripti. Jaqyn arada jalpy somasy 2,3 trln. teńgeniń 50 jobasyn paıdalanýǵa berý kózdelip tur. Osy­ǵan oraı arnaıy aımaqtarda qosymsha 17 myń turaqty jumys orny qurylady. Osy jaǵymdy jańalyqtarǵa toqtalǵan spıker, Úde­meli ındýstrııalyq-ınnova­sııalyq memlekettik damý baǵ­darlamasynyń alǵashqy besjyl­dyǵynda el aýmaǵynda taǵy 4 jańa arnaıy ekonomıkalyq aımaq salynǵanyn atap aıtty. Olar – «Saryarqa», «Pavlodar», «Taraz hımııalyq parki», «Qorǵas – Shyǵys qaqpasy». Qazirgi tańda aımaqtar aýmaǵynda ınfraqurylymdyq jumystar qyzý jalǵasyn taýyp jatyr. О́zge de arnaıy aımaqtardyń jumysy jóninde aıtyp ótken tóraǵa orynbasary salaǵa qatysty zańnama jetildirilip, birqatar túzetýler men tolyqtyrýlar engizilgenin jetkizdi. Qoǵamnyń jańa usynysy Úkimetten qoldaý taýyp, qazirgi kezde Parlament Májilisiniń qaraýyna túsipti. «Bul zań qabyldanar bolsa, osy baǵytta qyzmet etip júrgen kóptegen mekemelerdiń qyzmeti úılestirilip, jumys barysy bir ortalyqtan júıelenip otyrylatyn bolady. Qazirgi kúnde ár aımaqtyń óz ákimshiligi bar. Árqaısysy óz bilýimen jumys istep ke­ledi. Bizdiń paıymymyz boıyn­sha bul tirlik asa tıimdi emes. Máse­len, bizdiń usynysymyz iske asyrylyp jatsa, bir aımaqtyń qyzmetkerleri jumysty tıimdi júrgizý ádisin ozyq elderden úırenip kelse, ol tájirıbesin ózge de áriptesterimen bólisedi. Sóıtip, árqaısysynyń shetel mamandaryna júginýine qajettilik bolmaı, memleket aqshasy únemdeletin bolady. Jańa basqarý júıesiniń osyǵan uqsas birneshe tıimdi tustary bar», dedi ol. Arnaıy ekonomıkalyq aımaq­tardyń jumysyna erkin jáne arnaıy aımaqtardy basqarý men ke­ńes berýde kópjyldyq tájirı­besi bar álemdegi iri kompanııalardy tartý da kózdelip otyr eken. «Arnaıy ekonomıkalyq aımaqtardyń jumysyna erkin jáne arnaıy aımaqtardy basqarý men keńes berýde kópjyldyq tájirıbesi bar álemdegi iri kompanııalardy tartýdy maqsat ettik. Mysaly, byltyr «Jurong Consultants» halyqaralyq kompanııasynyń qatysýymen «PIT» arnaıy ekonomıkalyq aımaǵynda ozyq joba retinde basqarý úlgisin daıyndaı bastadyq. Bul baǵyttaǵy jumys jalǵasyp jatyr», degen A.Aıdarov, otandyq AEA jumystaryna, sondaı-aq, DP World, Shamrock, Tony Blair Associates, IDI, FEMOZA sııaqty kompanııalardyń tájirıbeleri de tartylyp jatqanyn aıtty. Nurbaı ELMURATOV, «Egemen Qazaqstan».