Foto: ashyq derekkóz
«Qazaqstan – áleýmettik memleket. Densaýlyq saqtaý, áleýmettik qamsyzdandyrý, ǵylym jáne mádenıet salasyna qatysty barlyq mindetteme tolyq oryndalady. Sheteldikter, ásirese, kórshi memleketterdiń turǵyndary bizdiń eldegi áleýmettik qyzmettiń sonshalyqty damyǵanyna qyzyǵa da, qyzǵana da qaraıdy. Sonyń ishinde kepildik berilgen tegin medısınalyq kómek jáne azamattarǵa arnalǵan kóptegen jeńildik bar. Tipti, Qazaqstandy «kommýnızm ornaǵan» el dep ataı bastady», dedi Prezıdent.
Sonymen birge Memleket basshysy bilim berý men medısına salasyndaǵy «jan basyna sáıkes qarjylandyrý» júıesi túbegeıli qaıta qaraýdy qajet etetinin aıtty. Onyń sózinshe, burmalanǵan tártip bıýdjetke salmaq túsirip, beı-bereket jaǵdaı qalyptastyrǵan.
«Bul salany memleketten qarjylandyrý júıesiniń ózin reformalaý kerek. Mınıstrliktiń burynǵy basshylary engizgen búgingi burmalanǵan tártip beı-berekettikke ákep soqtyrady, sebebi, qazirdiń ózinde qarajat jetpeı jatyr. Barlyǵy ashyq bolýǵa tıis, osy saladaǵy úrdistiń bárin sıfrlandyrǵan jón», dep atap ótti Qasym-Jomart Toqaev.
Prezıdent áleýmettik jeńildikterdi teris paıdalaný, jalǵan mártebe arqyly kómek alý faktilerine de qatań toqtaldy. Onyń aıtýynsha, bul másele áleýmettik ádildikke tikeleı qaýip tóndiredi.
«Zańsyz áreketter az emes. Sondyqtan, Úkimet pen quqyq qorǵaý organdaryna osy salada tártip ornatýdy tapsyrdym. Biz órkenıetti, ádiletti memleket quryp jatyrmyz. Qazaqstanda barlyq azamattyń quqyǵy birdeı, eshkimge eshqandaı artyqshylyq nemese basymdyq berilmeıdi», dedi Memleket basshysy.
Suhbatta qandastar máselesi de qozǵaldy. Prezıdent tarıhı Otanyna oralǵan aǵaıynnyń el ómirine durys kirigýi úshin júıeli jumys qajet ekenin atap ótti. Onyń aıtýynsha, bul baǵytta ortalyq jáne jergilikti bılik pen quqyq qorǵaý organdary birlese áreket etýge tıis.
