Foto: yerlansakenov
Kólik salasynyń serpini: LRT dáýiri bastalady
Astana jurtshylyǵy asyǵa kútken LRT jobasy 2026 jyldyń kókteminde halyq ıgiligine beriledi. Kóp jylǵa sozylǵan bul qurylys nysany resmı túrde qoǵamdyq kólik retinde esigin ashady. Qazirgi tańda synaq jumystary aıaqtalýǵa jaqyn. Búginde qalaǵa 4 quram jetkizilgen. Áýejaı mańyndaǵy Depo iske qosylyp, qala boıynsha stansııalardaǵy sońǵy árleý jumystary júrgizilip jatyr. Stansııalarda negizinen jeldetý, jylytý júıeleri men eskalatorlar men lıftterdi ornatý sekildi ishki jumystar qaldy.
Aıta keterligi, 2026 jyldyń mamyryna qaraı áýejaıdan LRT stansııasyna deıingi jabyq ótkel qurylysy aıaqtalýy tıis.
Sáýlet jáne resmı mekender: Memlekettik qabyldaý úıi
Aqordaǵa qarama-qarsy bette, Esil ózeniniń jaǵasyndaǵy kópir mańynda Memlekettik qabyldaý úıi boı kóteredi. Qurylysy aıaqtalýǵa jaqyn bul nysan joǵary deńgeıdegi mártebeli meımandardy qabyldaýǵa arnalǵan.
Bolashaqta memleket basshylary osy jerde kezdesip, sonyń áserinen kortejder baǵyty ózgerse, Máńgilik el dańǵylyndaǵy keptelis azaıyp, qala turǵyndaryna qolaıly jaǵdaı jasalar edi degen úmit basym.
«Myńjyldyq» alleıasynyń jańa keıpi
2026 jyly kópten kútken «Myńjyldyq» (Mynjyldyk) alleıasyn abattandyrý jumystary bastalady. Bul joba Jańa vokzal mańyndaǵy qurylystardyń sáýlettik úılesimin túbegeıli ózgertedi. Osy ýaqytqa deıin qoǵamdyq keńistikterden kende qalyp kelgen bul aýdan zamanaýı keıipke enedi.
Keıbir tustarda úılerdiń tyǵyz salynýyna baılanysty keńistiktiń tarylýy baıqalǵanymen, bul aımaq qalanyń eń tanymal demalys oryndarynyń birine aınalady dep kútiledi.
Sporttyq nysandar: «Qazaqstan» jáne Qajymuqan stadıony
«Qazaqstan» sport kesheniniń 2026 jyly modernızasııasy tolyq aıaqtalýy tıis. Buǵan deıin apatty dep tanylyp, ınvestordyń aýysýyna baılanysty jumysy turalap qalǵan keshende endi basseın men hokkeı alańy halyqqa qyzmet etetin bolady. Ásirese, «Almaty» aýdanynyń turǵyndary bul nysannyń ashylýyn taǵatsyzdana kútip júr.
1936 jyly irgesi qalanǵan Qajymuqan Muńaıtpasov atyndaǵy stadıonnyń ornyna salynǵan jańa jabyq arena 2026 jyldyń birinshi toqsanynda paıdalanýǵa beriledi. 3 600 oryndyq bul nysan qys mezgilinde de sporttyq sharalar men jattyǵýlar ótkizýge múmkindik beredi. Eń bastysy, jerdiń nysanaly maqsaty saqtalyp, kórermen syıymdylyǵy artady.
Saýda men bıznes: «Evrazııa» SO-nyń transformasııasy
2026 jyl elordadaǵy eń kóne saýda ortalyqtarynyń biri – «Evrazııa» úshin betburys kezeńi bolmaq. Kásipker Serik Tólbasy nysandy satyp alǵannan keıin, ony zamanaýı «mixed-use» platformasyna aınaldyrýdy kózdep otyr.
Munda gastronomııalyq bazarlar, jańa brendter, kórkem arhıtektýra men turǵyndar úshin oılastyrylǵan demalys aımaqtary paıda bolady. Bul aýdannyń saýda konsepsııasy túbegeıli jańarady.
Jasyl beldeý jáne rýhanııat
«Damý» (Damu Park) saıabaǵy: Ál-Farabı dańǵyly men Kereı-Jánibek handar kóshesiniń qıylysynda (Capital park aýdany) ornalasqan bul saıabaq 2026 jyldyń jazynda ashylady.
Munda toǵan, sporttyq aımaqtar, saýda pavılondary men dámhanalar bolady.
Pravoslav hramy men rýhanı keshen: Ulttyq ǵarysh ortalyǵy mańynda jańa rýhanı-aǵartýshylyq kesheni boı kóteredi. 2025 jyly Patrıarh Kırıll negizin qalaǵan bul jobanyń alǵashqy ǵımaraty 2026 jyly daıyn bolady. Bolashaqta munda mektep, balabaqsha, medısınalyq jáne ákimshilik mekemelerdi qamtıtyn 7 ǵımarattan turatyn qalashyq paıda bolady.
Jańa Kongress-holl
Beıbitshilik jáne kelisim saıabaǵy mańynda salynyp jatqan jańa Kongress-holl da 2026 jyly esigin ashady. Depýtattar qalashyǵyna jaqyn ornalasqan bul nysan tynysh lokasııada bolýymen erekshelenedi.
Múmkin, aldaǵy ýaqytta mańyzdy halyqaralyq kezdesýler turǵyn úılermen qorshalǵan Táýelsizdik saraıynda emes, dál osy jerde ótetin bolady.
