Foto: ashyq derekkóz
Máselen, aılyq eseptik kórsetkish 4 325 teńgege jetse, kúnkóris mınımýmy 50 851 teńge bolyp belgilendi. Eń tómengi zeınetaqy mólsheri 69 049 teńgege deıin ósedi.
Balaly otbasylarǵa beriletin birjolǵy járdemaqy da ulǵaıdy. Birinshi, ekinshi jáne úshinshi bala týǵan kezde tólenetin tólem 164 350 teńgeni quraıdy. Al tórtinshi jáne odan keıingi balalar úshin beriletin járdemaqy 272 475 teńgege deıin artty.
Kópbalaly otbasylarǵa arnalǵan aı saıynǵy tólemder de kóbeıtildi. Tórt balasy bar otbasylar 69 330 teńge alsa, on balasy bar otbasylarǵa tólenetin járdemaqy 173 000 teńgege jetedi.
Múgedektigi bar azamattarǵa kórsetiletin memlekettik qoldaý kólemi de qaıta qaraldy. Birinshi toptaǵy múgedektik boıynsha járdemaqy 111 872 teńgege, ekinshi topta 89 498 teńgege, úshinshi topta 61 021 teńgege deıin ósti.
Salyq salý júıesinde de eleýli ózgerister bar. 2026 jylǵy 1 qańtardan bastap qosylǵan qun salyǵy 12 paıyzdan 16 paıyzǵa deıin ósedi. Sonymen birge QQS boıynsha mindetti tirkeý shegi 15 mln teńgeden 40 mln teńgege deıin ulǵaıtyldy. Bul shaǵyn kásipkerler úshin ákimshilik júktemeni azaıtýǵa baǵyttalǵan.
Birqatar taýarlar men qyzmetter QQS-tan bosatylady. Olardyń qatarynda tegin medısınalyq kómektiń kepildendirilgen kólemi aıasyndaǵy qyzmetter, mindetti áleýmettik medısınalyq saqtandyrý júıesindegi qyzmetter, sondaı-aq otandyq kitaptar men olardy basyp shyǵarý qyzmetteri bar.
Korporatıvtik tabys salyǵynyń bazalyq mólsherlemesi 20 paıyz deńgeıinde saqtalady. Alaıda salalar boıynsha saralanǵan tásil engiziledi. Bankter men oıyn bıznesi úshin mólsherleme 25 paıyzǵa deıin kóteriledi. Áleýmettik sala uıymdary 2026 jyly 5 paıyz tóleıdi, al 2027 jyldan bastap bul kórsetkish 10 paıyzǵa ósedi. Aýyl sharýashylyǵy taýaryn óndirýshiler úshin jeńildetilgen 3 paıyzdyq mólsherleme qarastyrylǵan.
Avtokólik ıelerine de belgili bir jeńildikter bar. Jeńil avtomobılderge salyq salýda kóliktiń jasyna qaraı tómendetetin koeffısıentter qoldanylady. On jyldan jıyrma jylǵa deıingi kólikterge 0,7 koeffısıenti, al jıyrma jyldan asqan kólikterge 0,5 koeffısıenti belgilengen.
Sonymen qatar ardagerler, memlekettik nagradalary men ataqtary bar azamattar, kópbalaly analar jáne múgedektigi bar tulǵalar kólik salyǵynan bosatylady. Alaıda bul jeńildik qozǵaltqysh kólemi 4 000 tekshe santımetrden asatyn jáne menshik quqyǵy 2013 jyldyń 31 jeltoqsanynan keıin rásimdelgen kólikterge qoldanylmaıdy.
Jańa ózgerister áleýmettik qoldaýdy kúsheıtip, salyq júıesin teńgerimdi etýge baǵyttalǵan.
Ilgerirekte Jańa Salyq kodeksiniń kúshine enýine baılanysty jańa rejımge kóshý tártibi men ótpeli kezeń merzimi týraly jazǵan bolatynbyz.
