Saltanatty is-sharada óńir basshysy Prezıdent Qasym-Jomart Toqaev Ulttyq quryltaı otyrysynda sportty, ásirese balalar men jasóspirimder sportyn damytý memlekettik saıasattyń negizgi baǵyttarynyń biri ekenin atap ótkenin eske saldy. Osy strategııalyq mindetke sáıkes, Mańǵystaý oblysynda buqaralyq sportty damytý, sporttyq ınfraqurylymnyń qoljetimdiligin arttyrý jáne jastardyń turaqty túrde sportpen shuǵyldanýyna jaǵdaı jasaý baǵytynda júıeli jumys júrgizilip keledi.
Oblys ákiminiń aıtýynsha, sońǵy eki jylda dene shynyqtyrý men sportty damytý maqsatynda 10 qosymsha memlekettik mekeme ashylǵan. Tek 2025 jyldyń ózinde 6 sport nysany paıdalanýǵa berilgen. Sonymen qatar ol daryndy balalarǵa arnalǵan oblystyq mamandandyrylǵan mektep-ınternat-kolledjiniń jáne sportty damytý dıreksııasynyń ashylýy óńir sportshylaryna bolashaqta halyqaralyq arenalarda, sonyń ishinde Olımpıada oıyndarynda el namysyn abyroımen qorǵaýǵa múmkindik beretinine senim bildirdi.
Is-shara barysynda bilim salasyndaǵy jetistikter de erekshe atap ótildi. Astana qalasynda ótken aýyl mektepteriniń oqýshylaryna arnalǵan respýblıkalyq olımpıadanyń qorytyndysy boıynsha Mańǵystaý oblysynyń oqýshylary jaratylystaný-matematıkalyq baǵyt boıynsha «Úzdik olımpıadalyq komanda» nomınasııasynda Gran-prı ıelenip, qoǵamdyq-gýmanıtarlyq baǵyt boıynsha «Úzdik olımpıadalyq komanda» nomınasııasynda I orynǵa ıe boldy.
О́ńir basshysy jeńimpazdardy, olardyń ata-analary men jetekshi ustazdaryn quttyqtap, aýyl mektepterindegi daryndy balalardy qoldaý aldaǵy ýaqytta da aımaq úshin basym baǵyt bolyp qala beretinin atap ótti.
– Bul jaı ǵana marapat emes. Bul tabandylyqtyń, úzdiksiz eńbektiń jáne bilimge degen shynaıy qushtarlyqtyń nátıjesi. Aýyl mektebinde oqyp, respýblıkalyq deńgeıde óz bilimińdi dáleldeý – úlken jetistik ári maqtanysh. Alda sizderdi úlken jol kútip tur. Búgingi jeńis – sol joldaǵy alǵashqy mańyzdy qadamdardyń biri. Bilimge degen súıispenshilikterińiz eshqashan sónbesin, al maqsattaryńyz bıik bolsyn. El men óńirdiń abyroıyn asqaqtatatyn tulǵalar bolyp ósýlerińizge tilektespin. Mańǵystaý oblysynda daryndy balalardy qoldaý – basty basymdyqtardyń biri. Aldaǵy ýaqytta da aýyl mektepterindegi bilim sapasyn arttyryp, talantty oqýshylardy qoldaýdy jáne olardyń respýblıkalyq ári halyqaralyq deńgeıde jetistikke jetýine barlyq jaǵdaıdy jasaýdy jalǵastyramyz, – dedi Nurdáýlet Qılybaı.
Is-shara sońynda sportshylar men olımpıada jeńimpazdaryna marapattar men aqshalaı syıaqylar tabystaldy. Sondaı-aq jeńimpazdardyń ata-analary men jetekshi ustazdary da marapattaldy.
