Búginde 600 oqýshyǵa arnalǵan jańa úsh qabatty ǵımarattyń qurylys jumysynyń 40% -y oryndalǵan, shatyryn jabý, ishki árleý jáne aýmaqty abattandyrý syndy jumystar júrip jatyr. Kestege sáıkes, nysan 2026 jyldyń qarasha aıynda salynyp bitedi dep josparlanǵan, alaıda merdiger uıym qyrkúıekke deıin tapsyrýǵa daıyn ekenin aıtyp otyr. Bul mektep oqýshylaryna jańa oqý jyly partaǵa otyrýǵa múmkindik beredi.
Májilis depýtaty Gúldara Nurym atap ótkendeı, bilim berý salasyndaǵy memlekettik saıasat jańa mektepter salýdy jáne qolaıly jaǵdaılardy qamtamasyz etýdi ǵana emes, eń aldymen oqýshylar men olardyń pedagogterine qamqorlyq jasaýdy da qamtıdy.
– Sońǵy jyldary muǵalimderdi qoldaý boıynsha túbegeıli sheshimder qabyldandy. «Pedagog mártebesi týraly» Zań qabyldanǵannan beri alty jyl ótti, ol aıtarlyqtaı nátıje berdi. Bes jyl ishinde ortasha jalaqy 109 myń teńgeden 390 myń teńgege deıin ósti, muǵalimderdiń júktemesi 14 saǵatqa qysqardy, al pedagogtardyń 82% - y qazir ózderiniń eńbegi qoǵamda baǵalanady dep senimdi túrde aıtady. Sonymen qatar, biliktiligi men ótili úshin ústemeaqylar engizildi, muǵalimniń erekshe quqyqtyq mártebesi bekitildi, oqytýshylardyń birneshe sanaty úshin demalys kúnderi ulǵaıtyldy, synyp jetekshiligi úshin qosymsha aqylar jáne taǵy basqalary ulǵaıdy. Munyń bári – Memleket basshysynyń bastamasymen jáne «AMANAT» partııasynyń qoldaýymen júrgizilip jatqan dáıekti memlekettik saıasattyń nátıjesi. Jańa mektepter tek zamanaýı kabınetterden ǵana emes, sondaı-aq yntaly, qorǵalǵan pedagogtarden de quralýy tıis, – dep atap ótti depýtat.
Nysannyń jaı-kúıin kórgen depýtattar mektep ınfraqurylymyn damytý memleket úshin basym mindetterdiń biri bolyp qala beretinin atap ótti. Muqash Eskendirovtyń aıtýynsha, óńirdegi oqýshylar sanynyń ósýi bilim berý mekemelerin de tezdetip salýdy qajet etedi.
– Jańa oqý jylynda óńirde 247 myńǵa jýyq oqýshy bolady, onyń 20 myńǵa jýyǵy 1-synypqa barady. Mektepterdiń qurylysy otbasylardyń ómir súrý sapasyna tikeleı baılanysty. Bilim berýdiń qoljetimdiligi týraly aıtatyn bolsaq, bul balalar men ata-analarǵa arnalǵan naqty jaǵdaılarǵa tikeleı qatysty. Jańa ǵımarattar shamadan tys júktemeni azaıtady, ekinshi aýysymdar kemıdi jáne qalypty bilim berý ortasy qalyptasady. Sondyqtan mundaı nysandar bizdiń partııamyzdyń turaqty baqylaýynda, – dep atap ótti ol.
Májilis depýtattarynyń óńirlerdegi kezdesýleri 5-13 qańtar aralyǵynda jalǵasady. Jumys saparlary barysynda AMANAT, Aýyl, Aq jol, JSDP, QPK jáne Respublica saıası partııalarynyń parlamenttik fraksııalarynyń depýtattary saılaýshylardy qabyldanǵan zańdar týraly habardar etedi, olardyń jergilikti jerlerde qoldanylý barysyn zerdeleıdi jáne azamattardy tolǵandyratyn ózekti máseleler men problemalardy tyńdaıdy.
