Zaýyttyń bas dırektory Qýanysh Bıshimovtiń aıtýynsha, mundaı jobany iske asyrý úshin osy salada mol tájirıbesi bar seriktes qajet. О́ıtkeni jasandy ıntellektimen munaı óńdeý zaýytyndaǵy túrli jabdyqtyń isten shyǵýyna predıktıvti taldaý júıesi qoldanylady. Mine, osyndaı sebeppen atalǵan jobany engizýge AQSh-tyń ónerkásiptik avtomattandyrý jáne tehnologııalyq úderisterdi basqarý salasynda ozyq tájirıbe jınaqtaǵan «Honeywell» korporasııasy seriktes retinde tartylypty.
«Munaı óńdeý tehnologııasy kúrdeliligimen erekshelenedi. Osy oraıda predıktıvti taldaý jabdyqtarda jumys parametrleri negizinde yqtımal aqaýlardyń bastapqy belgilerin anyqtaıdy. Jabdyqtardyń tehnıkalyq jaı-kúıin boljaýǵa múmkindik beredi. Jasandy ıntellekt júıesi aýqymdy derekterdi taldaıdy. Tehnologııalyq aýytqýlardy anyqtap, jabdyqtardyń naqty jaǵdaıyna sáıkes tehnıkalyq qyzmet kórsetý múmkindigin qamtamasyz etedi. Tehnıkalyq personalǵa arnaıy usynystar daıyndaıdy», deıdi Q.Bıshimov.
Onyń deregine qaraǵanda, munaı óńdeý zaýytynda predıktıvti taldaýdy engizý birneshe úderisti biriktiretin biryńǵaı monıtorıng júıesin qurýǵa baǵyttalyp otyr. Birinshiden, derekterdi jınaýǵa basymdyq beriledi. Ekinshiden, jabdyqtardyń tehnıkalyq kúıine taldaý jasalady. Úshinshiden, basqarýshylyq sheshimderdi qoldaýǵa baǵyt ustalady.
«Bul oqys jaıttar men apattyq jaǵdaıda toqtatý táýekelin tómendetedi. Jabdyqtardyń senimdiligin arttyryp, qyzmet kórsetý merzimin uzartady. Mundaı tıimdilik óndiristik aktıvterdi tıimdi basqarýǵa múmkindik beredi», deıdi bas dırektor.
Qazir munaı óńdeý zaýytynda damyǵan sıfrlyq ekojúıe qalyptasqan. Bul júıede óndiristik, energetıkalyq jáne zerthanalyq úderisterdi basqarý, onyń ishinde Honeywell PHD derekterdi saqtaý platformasy, MES sanatyndaǵy sheshimder men jabdyqtardy monıtorıngileý baǵyty bar.
«Sıfrlandyrýdyń jańa kezeńi zaýyttyń asa mańyzdy tehnologııalyq qondyrǵylaryn qamtydy. Atap aıtqanda, qazan aıynda «Honeywell» korporasııasymen birlese iske qosylǵan pılottyq joba katalıtıkalyq krekıng qondyrǵysynyń kompressory men úzdiksiz katalıtıkalyq rıformıng qondyrǵysy bar CCR kesheniniń negizgi jabdyqtaryna engizildi. Zaýyt óndirisindegi jańa tehnologııanyń tıimdiligi dáleldenip otyr. Bul júıe kompressordaǵy jasyryn anomalııany anyqtap, aqaý josparly aldyn alý jumystary kezinde joıyldy», dep málimdedi Q.Bıshimov.
Sondaı-aq zaýyt «Dınamıka» ǵylymı-óndiristik ortalyǵymen yntymaqtastyqty nyǵaıtyp otyr. Bul – dirildi dıagnostıkalaý, kompıýterlik monıtorıng, ónerkásiptik jabdyqtardyń tehnıkalyq jaı-kúıin keshendi baǵalaý tehnologııalary men júıelerin ázirleýge, engizýge mamandanǵan reseılik kompanııa.
«Byltyr atalǵan kompanııanyń dirildi dıagnostıkalaý júıesi zaýyttaǵy 819 tehnıkany qamtydy. Al (katalıtıkalyq krekıngtiń benzınin gıdrotazartý keshenindegi Prime G qondyrǵysynyń fýnksıonalyn keńeıtý aıasynda júıege qosymsha qysym, temperatýra jáne deńgeı parametrleri engizildi. Jasandy ıntellekt modelderi munda da joǵary nátıje kórsetti. Júıe sorǵylardyń kirisindegi qysymnyń tómendeýin avtomatty túrde anyqtap, nátıjesinde jabdyqtyń jumysy dereý turaqtandyryldy», deıdi kásiporyn basshysy.
«QazMunaıGaz» kompanııasy bul jobalardy operasııalyq tıimdilikti arttyrýǵa baǵyttalǵan uzaqmerzimdi strategııanyń negizi retinde qarastyryp otyr. Al Atyraý munaı zaýyty úshin predıktıvti taldaýdy engizýdiń úsh jyldyq baǵdarlamasy ázirlendi. Máselen, aldaǵy monıtorıng júıesi engiziletin asa mańyzdy 28 birlik jabdyqtyń tizimi jasaqtaldy. Qazir kompanııa sarapshylary ózge de jetekshi vendorlardyń tehnıkalyq sheshimderin jan-jaqty zerdeleýdi qolǵa aldy.
Atyraý oblysy
