Memleket basshysynyń jańa jyldy elimizdiń beldi basylymyna arnaıy suhbat berýimen bastaýy jaqsy dástúrge aınaldy. Jurtshylyq erekshe kútetin bul dástúr el Prezıdentiniń baspasózdiń aǵartýshylyq, taldamalyq rólin erekshe baǵalaýyn aıshyqtaıdy. Oılanýǵa úıretetin, asyqpaı oqylatyn mátinder – qoǵamnyń zııatkerlik ımmýnıteti. Oqıtyn ult qana aldyńǵy qatarda bolady.
Prezıdent aıtqandaı, 2025 jyl elimiz úshin ekonomıkalyq kórsetkishter turǵysynan tabysty boldy. Ekonomıka ósimi 6 paıyzdan asty, ishki jalpy ónim 300 mlrd dollarǵa jetti. Alaıda bul jetistikterge masattanýǵa bolmaıdy. Memleket basshysy ekpin túsirgen oı – ósimniń ózi maqsat emes, ol azamattardyń turmys sapasyna tikeleı áser etýge tıis. Inflıasııa – kózge kórinbeıtin, biraq eń qaýipti jaý. Sondyqtan Úkimet pen ákimderge qoıylatyn talap – bir sátke de bosańsymaý, áleýmettik-ekonomıkalyq qańqany nyǵaıtý.
О́tken jyldyń basty qorytyndysy – reformalardyń qaıtymsyzdyǵy. Bul sóz saıası uran emes, tarıhı mejeni bildiredi. Qazaq eli burynǵy ınersııamen ómir súrmeıdi. Alǵa jyljý bar, ol kúrdeli, keıde aýyr, keıde qoǵamǵa unamaıtyn sheshimder arqyly júzege asýda. Biraq Memleket basshysy úshin basty ólshem – popýlızm emes, nátıje. «Bizde basqa jol joq» degen sózdiń astarynda úlken jaýapkershilik jatyr.
Sol jaýapkershiliktiń aıqyn kórinisi – salyq reformasy. Jańa Salyq kodeksi fıskaldyq naýqan emes, ekonomıkalyq oılaýdyń ózgerýi retinde usynyldy. Bul – memleket, bıznes jáne azamat arasyndaǵy jańa qoǵamdyq kelisim. Munda salyq jazalaý quraly emes, ortaq jaýapkershiliktiń tetigi. Memleket basshysy atap ótkendeı, ádiletti salyq júıesi álsizdi qoldap, ekonomıkanyń tiregin nyǵaıtýǵa tıis. Salyq tóleý – májbúrlik emes, zamanǵa saı patrıotızmge aınalýy qajet.
Ekonomıkadaǵy teńgerimsizdikterdi túzemeıinshe, uzaqmerzimdi turaqtylyqqa qol jetkizý múmkin emes. Energetıka men kommýnaldyq ınfraqurylymdaǵy máseleler – ondaǵan jyl boıy qordalanǵan shyndyq. Olardy jasyryp, bıýdjet qarjysymen ýaqytsha jamaý nátıjesiz ekenin ómirdiń ózi kórsetti. Qazir bul salada naqty modernızasııa bastaldy: apattyq táýekel azaıdy, «qyzyl aımaqtaǵy» nysandar sany qysqardy. Munda da Memleket basshysy úshin bastysy – kózboıaýshylyq emes, naqty nátıje.
Tarıf máselesi – eń sezimtal taqyryptyń biri. Alaıda shyndyqty aınalyp ótý múmkin emes. Arzan tarıfter baılarǵa jasyryn sýbsıdııa boldy. «Kóp tutynsań – kóp tóleısiń» qaǵıdaty ádiletti ekonomıkanyń negizi. Al áleýmettik osal toptar mindetti túrde adresattyq qoldaýǵa ıe bolýǵa tıis. Ádilet degenimiz – barlyǵyna birdeı emes, árkimge qajettisin berý.
Elimizdiń tranzıttik áleýeti – strategııalyq artyqshylyq. Memleket aýmaǵy arqyly ótetin halyqaralyq dálizder, jańa temirjol jelileri, porttar men logıstıkalyq habtar – munyń bári eldi Eýrazııanyń kólik qaqpasyna aınaldyrýǵa baǵyttalǵan. Munda da júıelilik pen uzaqmerzimdi kózqaras qajet.
Agrarlyq sektorǵa kórsetilip otyrǵan qoldaý aýqymdy. Biraq Memleket basshysy atap ótkendeı, sýbsıdııanyń ózi táýeldilikke aınalmaýǵa tıis. Kooperasııa, ónimdilik, eksportqa baǵyttalǵan óndiris – aýyl sharýashylyǵynyń bolashaǵy osynda. Elimiz tek astyqpen emes, et eksportymen de álemdik naryqqa shyǵýǵa qabiletti.
Týrızm, sıfrlandyrý, jasandy ıntellekt, atom energetıkasy, sırek kezdesetin metaldar – bulardyń barlyǵy biz úshin jańa múmkindikter terezesi. Biraq kez kelgen tehnologııanyń ózeginde adam kapıtaly turady. Sondyqtan bilim, kadr daıarlaý, eńbek mádenıeti – memlekettiń basty ınvestısııasy.
Zańsyz aktıvterdi qaıtarý, sybaılas jemqorlyqpen kúres – munyń bári áleýmettik ádilettilikti qalpyna keltirýge baǵyttalǵan. Bul – naýqan emes, qaǵıdat. Memleket zań aıasynda áreket etip, álemge óziniń ustanymyn ashyq kórsetip otyr.
Patrıotızm týraly aıtqanda da Memleket basshysy naqty ólshem usynady. Patrıotızm – uran emes, eńbek. Elge adal qyzmet etip júrgen ınjener, dáriger, muǵalim, fermer – naǵyz otanshyl tulǵalar.
Memleket basshysynyń «Turkistan» basylymyna bergen suhbatynda aıqyn aıtylǵan oı alda turǵan 2026 jyl – taǵdyrly kezeń. Saıası jáne ekonomıkalyq reformalardyń jańa kezeńi bastalady. Bul jol jeńil emes. Biraq tarıh kórsetkendeı, qıyndyqtardan qashpaı, shyndyqqa týra qaraǵan qoǵam ǵana ósedi. Ár oqyrmannyń sanasynda qalyptasýy qajet parasatty paıym. Qazaqstan dál osy joldy tańdady.
Bıbigúl JEKSENBAI,
Senat depýtaty
