Foto: AVN
Ant berý kezinde Rodrıges el halqynyń basynan ótken aýyr kezeńdi atap ótip, memlekettegi beıbitshilikti qamtamasyz etýge bar kúshin salatynyn aıtty. Onyń sózinshe, ulttyq birlik pen uıymdasqan halyqtyń qýaty eldiń egemendigin saqtaýdyń basty kepili.
Delsı Rodrıges Venesýela tarıhynda atqarýshy bılikti basqarǵan alǵashqy áıel atandy. Ol qazirgi ahýaldy el turaqtylyǵyna tóngen syn-qatermen baılanystyryp, beıbit ómirdi qamtamasyz etpeıinshe bir sátke de toqtamaıtynyn málimdedi.
Sol kúni parlament otyrysynda onyń aǵasy Horhe Rodrıges Ulttyq assambleıa tóraǵasy qyzmetine bekitildi. Al AQSh prezıdenti Donald Tramp Venesýelaǵa qatysty qysymdy kúsheıtip, Delsı Rodrıgestiń eldegi ótpeli kezeńge jaýapty bolatynyn málimdegen.
О́z kezeginde ýaqytsha prezıdent AQSh-pen ózara yntymaqtastyqqa daıyn ekenin aıtyp, Venesýelanyń beıbit ómir súrýi men egemendigine quqyǵy bar ekenin atap ótti.
Delsı Rodrıges chavızm baǵytyndaǵy yqpaldy saıası tulǵalardyń biri sanalady. Zańger mamandyǵyn alǵan ol bolıvarlyq jobany qoldaıdy. Buǵan deıin syrtqy ister mınıstri jáne atqarýshy vıse-prezıdent qyzmetterin atqaryp, úkimettiń strategııalyq salalarynda saıası salmaǵyn kúsheıtti.
Aqparat kózderiniń habarlaýynsha, ol ýaqytsha prezıdent mindetin qazirgi memleket basshysy Nıkolas Madýro amerıkalyq áskerı qurylymdar tarapynan ustalǵannan keıin qabyldaǵan. Madýro men jubaıy Sılııa Flores Nıý-Iorktegi federaldy sot aldynda esirtki terrorızmine qatysty aıyptarmen jaýap berip jatyr. Ekeýi de ózderine taǵylǵan aıyptardy moıyndamaı, 17 naýryzǵa belgilengen qaıta tyńdaýǵa shaqyrylǵan.
Buǵan deıin Edmýndo Gonsales ózin Venesýela prezıdenti dep jarııalaǵan bolatyn.
