Qala – óńirdegi eń iri bilim berý ortalyqtarynyń biri. Kópultty stýdenttik orta almatylyq joǵary oqý oryndaryna degen turaqty qyzyǵýshylyqty arttyryp, qalanyń bilim berý ekojúıesiniń halyqaralyq sıpatyn kúsheıtip otyr.
Aıta keteıik, 2023 jyly Qazaqstanda 82 elden kelgen 26 myń sheteldik stýdent bilim alǵan. Bul eldegi stýdentterdiń jalpy sanynyń 4,4%-y (606 myń adam). Sheteldik stýdentterdiń eleýli bóligi elimizdiń eń iri stýdenttik ortalyǵy sanalatyn Almatyǵa tıesili.
Sheteldik stýdentterdiń basym kópshiligi ál-Farabı atyndaǵy Qazaq ulttyq ýnıversıtetinde oqıdy – 4,5 myń adam. Ekinshi orynda S. Asfendııarov atyndaǵy Qazaq ulttyq medısına ýnıversıteti. Munda 1,9 myń sheteldik stýdent bilim alyp júr, onyń ishinde 1,2 myń adam (63,2%) úndi etnosynyń ókilderi.
Úzdik úshtik qatarynda Q. Sátbaev atyndaǵy Qazaq ulttyq tehnıkalyq zertteý ýnıversıteti bar. Atalǵan oqý ornynda Túrkimenstannan kelgen 1,9 myń sheteldik stýdent bilim alyp júr. Abaı atyndaǵy Qazaq ulttyq pedagogıkalyq ýnıversıtetinde 1,8 myń sheteldik stýdent oqıdy.
«Sońǵy bir jyldyń ishinde sheteldik stýdentter sany 45%-dan astamǵa ósti (17,1 myńnan 22,6 myńǵa deıin, ıaǵnı 5,5 myńǵa artty). Bizdiń joǵary oqý oryndarynyń álemdik reıtıngterdegi ornyn nyǵaıtyp, halyqaralyq baǵdarlamalardy damytyp, joǵary sapaly zamanaýı bilim berý ortasyn qalyptastyryp jatqany biz úshin úlken maqtanysh. Bul álemniń túkpir-túkpirinen keletin stýdentterdiń qyzyǵýshylyǵyn oıatady», deıdi Almaty qalasy Jastar saıasaty basqarmasynyń basshysy Azız Kajdenbek.
