Sýret: orda.kz
IIM taratqan aqparatqa sáıkes, polısııa ótken jyly baılanys operatorlarymen birlesip, 19 mln-nan asa jalǵan qońyraýdy buǵattaǵan. Sondaı-aq 85 mln-nan asa alaıaqtyq qońyraýdyń joly kesildi. Qylmystyq toptardy qurý men basqarý faktileri boıynsha 6 qylmystyq (bireýi transulttyq) is qozǵalǵan.
Sonymen qatar qabyldanǵan tehnıkalyq sharalardyń nátıjesinde qylmyskerler paıdalanǵan 100 myńnan asa SIM-karta men 88 SIM-box qurylǵysy tárkilengen. Byltyr elimizden tys jerlerde 7 call-ortalyqtyń zańsyz qyzmeti toqtatyldy. Budan bólek, el aýmaǵynda taǵy osyndaı 6 ortalyqtyń qyzmeti joıyldy.
Kıberqylmysqa qarsy kúres – Ishki ister mınıstrliginiń qyzmetindegi basym baǵyttardyń biri. Azamattardy sıfrlyq keńistikte qorǵaý maqsatynda qazir polısııa keshendi jumystar júrgizip jatyr. Memlekettik organdarmen birlesip, mundaı qylmystardyń aldyn alý boıynsha júıeli profılaktıkalyq sharalar qolǵa alynǵan. Internet qaryshtap damyǵaly «dástúrli» qylmys túrleri onlaın-keńistikke aýysyp, olardyń jańa formalary paıda boldy. Búginde urlyqtar ınternet jelisi arqyly jasalyp, qylmyskerler azamattardyń qarajatyn jymqyrý úshin zamanaýı tehnologııalardy qoldanady.
IIM baspasóz qyzmetiniń málimetinshe, mundaı qylmystarmen kúres zańnamalyq, tehnıkalyq jáne profılaktıkalyq sharalar sekildi úsh negizgi baǵytta júrgizilýge tıis. Keshendi tásil ǵana kıberqylmysqa qarsy turýǵa múmkindik beredi.
IIM qyzmetkerleri azamattardy alaıaqtardyń qurbany bolmas úshin qarapaıym qaýipsizdik erejelerin saqtaýǵa shaqyrady. Kúmándi siltemelerge ótpeý qajet, jeke derekterdi bógde adamdarǵa aıtpaý kerek, sondaı-aq bank kartalary men derekterin úshinshi tulǵalarǵa bermegen jón.
