Sýret: kazpravda.kz
Kezdesý barysynda Danııa Espaeva ótken jyly Májilis qabyldaǵan birqatar zańnyń mán-mańyzyn túsindirip, byltyr Parlament 100 zań qabyldaǵanyn, onyń 24-ine depýtattar bastamashylyq etkenin atap ótti.
Depýtattar sondaı-aq kezdesýge qatysýshylarǵa kólik quraldary ıeleriniń azamattyq-quqyqtyq jaýapkershiligi máseleleri boıynsha Májilis bastamashylyq etken zańdy tanystyrdy. Munda parlamentshilerdiń bastamalary jol-kólik oqıǵalary kezinde jábirlenýshilerdiń ómirine, densaýlyǵyna nemese múlkine zalal kelgen kezde tólenýge jatatyn saqtandyrý somalaryn ulǵaıtýǵa baǵyttalǵan.
Sondaı-aq depýtattar saqtandyrý kompanııalarynyń ókilderimen turǵyn úılerdi tabıǵı apattardan mindetti saqtandyrýdy engizý máselesin de talqylady.
Májilis depýtaty, «Aýyl» partııasy fraksııasynyń múshesi Jıgýlı Daırabaev Abaı oblysyna uıymdastyrylǵan jumys sapary barysynda aımaq basshysy Berik Ýálımen kezdesti. Onda oblys ákimi Májilis depýtatyna óńirdiń qazirgi tynys-tirshiligin tanystyryp, el ıgiligi jolynda atqarylyp jatqan jumys jaıyn baıandady.
Sapar aıasynda J.Daırabaev Semeı qalasyndaǵy «Qaztutynýodaǵy agrobıznes jáne ekonomıka kolledji» ujymymen kezdesý ótkizdi. Kezdesý barysynda májilismenge kolledjdiń oqý-tárbıe jumysy týraly aqparat berildi. Sondaı-aq ol oqý ornyn aralap, bilim uıasynyń materıaldyq-tehnıkalyq bazasymen tanysty. Sonymen qatar depýtat J.Daırabaev stýdentter men oqytýshylarǵa depýtattyq leksııa ótkizip, bilim salasynyń ózekti máseleleri men kadr daıarlaý týraly oı-pikirin ortaǵa saldy.
Májilis depýtaty Shákárim ýnıversıtetinde de kezdesý ótkizip, onda oqý oryndarynyń basshylarymen, oqytýshylarmen, stýdenttermen birge agrarlyq bilim men ǵylymnyń ózekti máselelerin talqylady.
Al Astanada Májilistegi JSDP fraksııasynyń múshesi, depýtat Ajar Saǵandyqova «Astana Eko Polıgon» JShS-nyń jumysymen tanysyp, ujymmen qatty turmystyq qaldyqtardy basqarý júıesindegi máseleler týraly áńgimelesti. Seriktestiktiń búgingi ahýalymen tanysý barysynda polıgonnyń qalypty qýatynan shamadan tys júktememen jumys istep jatqany aıtyldy. Iаǵnı qoldanystaǵy eki uıashyq tolǵan al úshinshi uıashyqtyń daıyn emestigi jáne qaldyqtardy suryptaý deńgeıiniń óte tómen bolýy Astanaǵa ekologııalyq qaýip tóndirip turǵany belgili boldy.
«Anyqtalǵan máseleler baqylaýǵa alynady, sondaı-aq ekologııalyq zańnamany jetildirý boıynsha usynystar ázirlenedi», dedi depýtat Ajar Baqytqyzy.
«Amanat» partııasy fraksııasynyń músheleri Maksım Rojın men Danııar Qasqaraýov Almaty oblysy Talǵar qalasyna bardy. Olar qalada 4 jyl buryn qurylysy qolǵa alynyp, alaıda búginde toqtap turǵan magıstraldyq sý taratqysh tóńiregindegi máseleniń mán-jaıyn bilýge tyrysty. Talǵar qalasyna sý jetkizetin negizgi júıe bolýǵa tıis bul sý taratqysh iske qosylsa, eski qubyrlar men tozǵan ınfraqurylymnyń júktemesi azaıyp, qala turaqty ári jetkilikti kólemde aýyzsýmen qamtylýy kerek-tin. Alaıda qurylys aıaqtalmaǵandyqtan, qala áli de eski sý jelisine táýeldi. Qurylystyń toqtap qalýyna tolyq qarjylandyrýdyń joqtyǵy sebep bolǵan. Al qazirgi 4 300 tekshe metrlik rezervýardyń syıymdylyq qýaty qalany aýyzsýmen tolyq qamtı almaı otyr. 50 myńǵa jýyq turǵyndy aýyzsýmen qamtıtyn bul joba úshin 4,6 mlrd teńge qajet. Qurylysty tolyq aıaqtaýǵa qajetti 1,7 mlrd teńgege jýyq qarjy áli bólinbegen. Oǵan sýdy hlorlaıtyn jabdyqtar, zerthanalyq quraldar men negizgi tehnologııalyq qurylǵylar alynyp, nysan bıylǵy shildede paıdalanýǵa berilýge tıis eken.
– Dál osy jabdyqtar ornatylmaıynsha nysandy paıdalanýǵa berý múmkin emes. Negizgi jabdyqtar men materıaldardy bıyl satyp alý qajet. Áıtpese, jobanyń quny qymbattap, iske asyrý merzimi taǵy da sozylyp ketýi múmkin. Sondyqtan oblystyq bıýdjetten jetispeı turǵan qarajatty ýaqyt ozdyrmaı bólý máselesin kóterip otyrmyz, – dedi M.Rojın.
Mańǵystaý oblysynyń Munaıly aýdanynda qaldyqtardy basqarý júıesine túsetin júktemeniń artýyna baılanysty problema týyndap otyr. Qaıta óńdeý qýatynyń jetispeýine baılanysty Baıandy aýylyndaǵy qatty turmystyq qaldyqtar polıgony óz aýmaǵyndaǵy ǵana emes, Aqtaý qalasynan, sondaı-aq Túpqaraǵan aýdanynyń birqatar aýyldarynan keletin qoqysty qabyldaýǵa májbúr. Jaǵdaıdy kózben kórip, naqty sheshimder ázirleý úshin nysanǵa Májilis depýtaty, «Amanat» partııasy fraksııasynyń múshesi Edil Jańbyrshın bardy. Májilistiń Ekologııa máseleleriniń jáne tabıǵatty paıdalaný komıtetiniń tóraǵasy munda qolǵa alynǵan sharalardyń májbúrli sıpatta ekenin jáne tolyqqandy qaıta óńdeý júıesin almastyra almaıtynyn atap ótti. E.Jańbyrshınniń aıtýynsha, depýtattardyń bastamasymen Májiliste ekologııa máselelerine qatysty túzetýler ázirlenip jatyr.
– Jańa zań jobasy qaldyqtardy basqarý júıesin jetildirýge, qaıta óńdeýge arnalǵan ekonomıkalyq yntalandyrý tetikterin engizýge jáne ótil tólemderine qatysty tásilderdi qaıta qaraýǵa baǵyttalǵan, – dedi depýtat.
E.Jańbyrshın jergilikti máslıhattardyń tóraǵalarymen jáne depýtattarymen de kezdesip, Májiliste qabyldanǵan, ázirlenip jatqan, azamattardyń ómir sapasyn arttyrýǵa baǵyttalǵan zańdar týraly, sondaı-aq negizgi salalyq máseleler boıynsha júrgizilgen taldamalyq jáne monıtorıngtik jumystardyń nátıjeleri jóninde keńinen baıandady.
