Kollajdy jasaǵan – Qonysbaı ShEJIMBAI, «EQ»
Máselen, Atyraý óńiriniń ortalyǵy men oǵan taıaý ornalasqan eldi mekenderdegi, Maqat aýdanyndaǵy turǵyndardy sýmen qamtıtyn jetekshi mekeme – «Atyraý oblysy Sý Arnasy» KMK. Munaıly shaharda arnaıy qurylǵylarmen táýligine shamamen 120 myń tekshe metr sý tazartylady. Onyń ishinde Amangeldi jáne Almaly aýyldaryndaǵy sý tazartatyn qurylǵylardyń ónimdiligi – táýligine 600 tekshe metr. Maqat kentinde táýligine 3 myń tekshe metr sýdy tazartýǵa arnalǵan qurylǵylar bar.
Atyraý qalasynda sý jetkizetin qubyrdyń uzyndyǵy 1 441 shaqyrymǵa sozylady. Kúndelikti tutynatyn sý shahar mańyndaǵy aýyldarǵa 1 316, Maqat pen Dossor kentide 125 shaqyrym qubyrmen jetkiziledi. Sý qysymy 53 sorap stansasynda kóteriledi. Bul kásiporyn 311 shaqyrym káriz qubyryna ıelik etedi.
«Atyraýda sýmen jabdyqtaý jáne sý burý júıesiniń jumysyn tıimdi basqarý maqsatynda dıspetcherlik pýnkt jumys istep tur. Oblystyq energetıka jáne turǵyn úı-kommýnaldyq sharýashylyq basqarmasynyń tapsyrysyna sáıkes «Atyraý oblysy Sý Arnasy» mekemesinde arnaıy júıe iske qosyldy. Bul júıeni káriz sorǵy stansalaryna, sorǵy kóterý stansalaryna, sý jınaý qurylǵylaryna, jylytý beketterine, sý jınaıtyn rezervýarlarǵa, kópqabatty turǵyn úılerge sý eseptegish jabdyqty qondyrý kózdeldi. Qazir 90-ǵa jýyq káriz sorǵysyna, 36 sorǵy kóterý stansasyna, kópqabatty 521 turǵyn úıge sý eseptegish qurylǵy qondyryldy», deıdi kásiporyn dırektory Meıirim Qalaýı.
Keıingi jyldary Atyraý qalasynyń oń jaǵalaýynda ornalasqan №5 sý súzgi stansasy paıdalanýǵa berildi. Bul jobanyń maqsaty – Jaıyq ózeninen alynǵan sýdy sapaly tazartyp, qala turǵyndardy aýyzsýmen qamtamasyz etý. Jańa stansada táýligine 50 myń tekshe metr sý tazartylady. Jaıyq ózeninen qalqymaly jáne jaǵadaǵy birinshi kóterý sorǵy stansalary arqyly alynady. Stansada árqaısysy 10 myń tekshe metr bolatyn úsh sý saqtaý rezervýary ornatylǵan.
«Qalqymaly stansa sý deńgeıi tómendegen jaǵdaıda da úzdiksiz jumys isteı beredi. Sý tazartý tundyrý, súzý jáne natrıı gıpohlorıdimen zalalsyzdandyrý arqyly júrgiziledi. Bul reagent stansa janyndaǵy qondyrǵyda as tuzynan óndiriledi. Jýý-shaıý sýlaryn qaıta paıdalanatyn júıe sý únemdeýge múmkindik beredi. Tazartylǵan sý úsh rezervýarda saqtalyp, ekinshi sorǵy stansasy arqyly turǵyndarǵa jetkiziledi», deıdi oblystyq energetıka jáne turǵyn úı-kommýnaldyq sharýashylyq basqarmasynyń ókili Amangúl Aıtbaı.
«Atyraý Sý Arnasy» KMK-nyń bas tehnologi Jámıla Isaǵalıevanyń deregine súıensek, Jaıyq ózeninen alynǵan tabıǵı sýdyń laılyǵy maýsymǵa jáne aýa raıyna baılanysty qubylyp turady. Keıde 28–30 paıyz shamasynda bolsa, keı mezgilde 80 paıyzǵa deıin jetedi.
«Sýdy tutynýshylarǵa jetkizbesten buryn birneshe kezeńnen turatyn mehanıkalyq jáne hımııalyq tazartý úderisi júzege asyrylady. Bul jumystyń nátıjesinde aýyzsý quramy 0,5 paıyzǵa deıingi mólsherde laıdan tazartylady. Osylaısha, sanıtarlyq talaptarǵa tolyq sáıkes keletin deńgeıge jetkiziledi. Qazir kásiporynda tórt sý tazartý stansasy jumys istep tur. Biz sýdy birneshe satyly súzgiden ótkizip, zerthanalyq baqylaýmen sapasyn tekserip otyramyz», deıdi J.Isaǵalıeva.
Atyraý oblysy
