Resmı málimetke sáıkes, sarbaz Jambyl oblysynyń qorǵanys isteri jónindegi departamenti arqyly, Taraz qalasynan áskerge shaqyrylǵan. Qyzmet barysynda ol birneshe ret medısınalyq kómekke júginip, dárigerlerdiń baqylaýynda bolǵan jáne qaladaǵy emdeý mekemelerinde tekserýden ótken.
6 qańtar kúni áskerı qyzmetshiniń júregi kenetten toqtaǵan. Júrgizilgen reanımasııalyq sharalarǵa qaramastan, ol qalalyq aýrýhanalardyń birinde kóz jumdy. Aldyn ala dıagnoz jedel leıkoz dep kórsetildi.
Atalǵan fakti boıynsha áskerı-tergeý basqarmasy qylmystyq is qozǵady. Jaǵdaı Ishki ister mınıstriniń orynbasary, Ulttyq ulannyń Bas qolbasshysynyń jeke baqylaýyna alyndy.
Eske salaıyq, buǵan deıin Mańǵystaý oblysynda áskerı qyzmetshi Dinmuhamedtiń qaza tapqany týraly aqparat taraǵan edi. Ol áskerge óziniń egiz baýyrynan keıin barǵan. Alǵashynda olar bir áskerı bólimde qyzmet etken, keıin olardyń biri basqa bólimge aýystyrylǵan. Osy jyldyń 17 qyrkúıeginde otbasy Dinmuhamedtiń qaıtys bolǵany týraly qaraly habar alǵan. Aldyn ala málimet boıynsha, sarbaz óz-ózine qol jumsady degen boljam aıtylǵan. Alaıda marqumnyń týystary bul nusqamen kelispeıtinin málimdedi. Keıinirek Qorǵanys mınıstriniń orynbasary Serik Boranbaev 19 jastaǵy Dinmuhamedtiń ólimine qatysty túsinikteme berip, egiz baýyrlar birge qyzmet etpegenin, olardyń ár ýaqytta jáne ártúrli eldi mekenderden áskerge shaqyrylǵanyn aıtty.
Qaperge alaıyq, Memeleket basshysynyń «Turkistan» gazetine bergen suhbatynda «Sarbazdardyń jaraqat alýy men qaza bolýy órkenıetti elge jat úrdis» dep aıtqan edi.
