Sarapshylardyń aıtýynsha, ınflıasııalyq qysym ázirge joǵary deńgeıde saqtalady. Degenmen, joǵary paıyzdyq mólsherlemelerdiń arqasynda teńgedegi depozıtter jınaq quraly retinde anaǵurlym tıimdi kórinedi.
Atap aıtqanda, Eýrazııalyq damý banki ortasha jyldyq aıyrbas baǵamyn 1 dollar úshin 535 teńge deńgeıinde boljaıdy. Al Qarjygerler qaýymdastyǵy men Halyqaralyq valıýta qory teńgeniń álsireýi 560 teńge sheginde bolýy múmkin dep esepteıdi. Bul jaǵdaıda qazirgi shamamen 515 teńgeden dollar satyp alyp, ony uzaq merzimge saqtaýdyń tıimdiligi tómen.
Sarapshylar qazirgi ekonomıkalyq jaǵdaıda eń utymdy nusqa – teńgedegi depozıtter ekenin aıtady. Valıýtalyq depozıtterdiń tabystylyǵy aıtarlyqtaı tómen.
Qarjygerler qaýymdastyǵynyń bas sarapshysy Ramazan Dosov bul jóninde bylaı deıdi:
«Teńgedegi depozıtterdiń tabystylyǵy 15-20% aralyǵynda. Al valıýtalyq depozıtter shamamen 1% ǵana beredi. Aıyrmashylyq óte úlken. Devalvasııalyq táýekelderdiń ózi 10%-dan aspaıdy. Kelesi jylǵa boljam boıynsha aıyrbas baǵamy qazirgi deńgeıden 6,3%-ǵa ǵana joǵary. Iаǵnı teńgeniń 20%-ǵa álsireýin eshkim kútip otyrǵan joq. Eger jınaǵyńyz az bolsa, ony tolyqtaı depozıtte ustaýǵa bolady. Al qarajat kólemi úlken bolsa, ártaraptandyrý oryndy».
Sonymen birge sarapshylar ámbebap sheshim joq ekenin eskertedi. Ár adamnyń jınaq kólemi, maqsaty men táýekelge daıyndyǵy ártúrli. Sondyqtan qarajatty ornalastyrý tásili de jeke tańdalýy tıis.
Ekonomıst Marat Abdýrahmanov naqty aktıvterge ınvestısııa salýǵa keńes beredi.
«Eń durys sheshim – materıaldyq aktıvterge salym jasaý. Turaqsyz kezeńde ınflıasııa tek teńgede emes, dollarda da, basqa valıýtalarda da bolady. О́tken jyly, shartty túrde aıtqanda, eki sıyrǵa ınvestısııa salǵandar depozıt paıyzynan da kóp paıda tapty. Sondyqtan adam ózi jaqsy biletin, túsinetin salaǵa ǵana qarjy salýy kerek», dedi ol.
Sarapshylardyń pikirinshe, 2026 jyly jınaqtardy basqarýda teńge, depozıtter jáne aqylǵa qonymdy ártaraptandyrý negizgi strategııa retinde qala beredi.
