Qala turǵyndary áleýmettik jelilerde jazba jarııalap, yqtımal sebepter men jaýapty taraptardy talqylaýda. Kópshiligi aýanyń aýyrlap ketkenin, keıbir adamdarǵa tynys alý qıyndaǵanyn aıtyp shaǵymdanǵan.
Bul jaǵdaı ekolog-belsendilerdiń de alańdaýshylyǵyn týǵyzdy. Qorshaǵan ortany qorǵaý máselesin jıi kóterip júrgen ekoaktıvıst Sergeı Efremov oqıǵanyń artynda adam faktory turýy múmkin ekenin atap ótti.
– Tereze ashý múmkin emes, birden jótel qysady, balalar kózimiz ashıdy dep shaǵymdanady. Dem alý qıyn, muryn qyshıdy. Qalada tuman turǵan sátterde keıbir kásiporyndar gazdy ádeıi shyǵaryp jiberýi múmkin dep oılaımyn, – dedi ol.
Qala turǵyndarynyń shaǵymynan keıin ekologtar kezekti tekserý júrgizdi. Saraptama qorytyndysy aýa quramynda qaýipti qospalardyń joq ekenin, barlyq kórsetkish belgilengen shekti mólsherden aspaǵanyn kórsetti.
Shymkent qalalyq ekologııa departamentiniń basshysy Ermahan Qozybaevtyń aıtýynsha, ıis sezilýi múmkin, alaıda ol adam densaýlyǵyna zııan keltiretin deńgeıden aspaýy yqtımal.
– Iis bolýy múmkin, biraq ol shekti ruqsat etilgen konsentrasııadan aspaýy múmkin. Eger norma buzylmasa, densaýlyqqa zııan joq dep esepteledi. Búgin departament mamandary da shyǵyp, aýa quramyn tekserdi. Qazirgi ýaqytta eshqandaı asyp ketý tirkelgen joq, – dedi ol.
Sonymen qatar BAITAQ partııasynyń ókilderi qaladaǵy aýa sapasyn ýákiletti organdarmen birge talqylady. Partııa músheleriniń pikirinshe, mamandardyń kásiporyndardy jedel tekserýge ókilettigi jetkiliksiz.
– Zańnamaǵa ózgeris engizip, ýákiletti organdardyń rólin kúsheıtý qajet. Qorshaǵan ortany qorǵaý máselesi basymdyqqa ıe bolýy tıis. Jaýapty qurylymdarda polısııa sııaqty jedel áreket etip, birden tekserý júrgizýge múmkindik bolýy kerek, – dedi partııanyń Shymkent qalalyq fılıalynyń tóraǵasy Altaı Ordabekov.
О́tken jyly ekologııa departamenti 30-dan astam kásiporyndy teksergen. Anyqtalǵan zańbuzýshylyqtar úshin jalpy somasy 40 mıllıon teńgeden asatyn aıyppul salyndy. Segiz uıymnyń qyzmeti ýaqytsha toqtatylǵan. Alaıda jaǵymsyz ıistiń naqty sebebi men ony sheshý joly áli de belgisiz bolyp otyr.
