Sýret: azattyq-ruhy.kz
Oblystyq polısııa departamentiniń baspasóz qyzmetinen málim etkendeı, byltyrǵy 25 jeltoqsanda Atyraý qalasynyń turǵyny aǵasynyń otbasy joǵalýyna baılanysty shaǵym túsirgen. Alaıda joǵalǵan jandardy izdestirý isi byltyrǵy 29 jeltoqsanda tirkelgen.
Joǵalǵandar – erli-zaıypty, olardyń qyzy men uly. Otaǵasy Maqsot Qarabalın – 1959, áıeli Násip О́teshqalıeva 1961 jyly ómirge kelgen. Erli-zaıyptynyń 1990 jylǵy qyzy Mıramgúl men 1993 jyly týǵan uly Naýryzdyń úshinshi toptaǵy múgedektigi bar.
Departament basshysynyń orynbasary Quttybaı Sadyqovtyń aıtýynsha, el aýmaǵyndaǵy emdelý oryndary tekserilip jatyr. Tórt adamnyń telefon nómiri Shymkent qalasynyń aýmaǵynda baılanysqa qosylǵan. Biraq tórteýi de elimizdiń shekarasynan tysqary shyqpaǵan.
«Iz-túzsiz joǵalǵan tórt adamnyń turmystyq jaǵdaıy ortasha bolǵan. Olarǵa aı saıyn zeınetaqy men járdemaqy túsip turǵan. Qarjylyq másele týyndamaǵan», deıdi Q.Sadyqov.
Onyń pikirinshe, olardy eshkim bopsalamaǵan. Erli-zaıyptylar mal ustaǵanymen, syrt kóz qyzyǵatyn baı-baqýatty emes. Bul otbasynyń qyzy men kúıeý balasy da izdestirilip jatyr. Olar qarashada Mahambet aýdanynyń Mahambet aýylyndaǵy úıinen shyǵyp ketkeni anyqtalypty.
«Kúıeý balasynyń týystarynan aryz túsken joq. Ol bes balasyn anasyna tastap, áıelin emdetýge alyp ketken. Olardyń Túrkistan oblysyndaǵy Qaplanbek shekara beketinen О́zbekstanǵa ótip, odan ári basqa elge ketkeni belgili bolyp otyr», dedi Q.Sadyqov.
Tórt adamnyń habar-osharsyz ketkeni jurtshylyqty alańdatty. Bári de olardyń ystyq uıasyna aman oralýyn tiledi. Alaıda seısenbide erli-zaıyptynyń múrdesi tabyldy. Bul derekti oblystyq polısııa departamentiniń basshysy Nurhat Orazbaev rastady.
«Atalǵan derekke qatysty adam óltirý belgilerimen qylmystyq is qozǵaldy. Kúdiktilerdiń jeke basy anyqtaldy. Qazir kúdiktilerdi tabý, ustaý maqsatynda tıisti jedel-izdestirý is-sharalary júrgizilip jatyr», dep málimdedi N.Orazbaev.
Onyń aıtýyna qaraǵanda, joǵalǵandardyń ekeýi áli tabylǵan joq. Olardyń júrgen jerin anyqtaýǵa qatysty izdestirý jalǵasa beredi.
Atyraý oblysy
