Palata spıkeri máslıhat depýtattarymen jáne jurtshylyqpen kezdesýde Memleket basshysynyń bastamasymen qolǵa alynǵan reformalardy sapaly iske asyrý úshin barlyq múddeli taraptyń birlesken jumysy erekshe mánge ıe ekenin aıtty. Sondaı-aq ol el Prezıdenti «Turkistan» gazetine bergen suhbatynda belgilep bergen mindetterge nazar aýdaryp, sıfrlandyrý, jasandy ıntellektini damytý men Qazaqstandy sıfrlyq derjavaǵa aınaldyrý týraly bastamalar aıasynda kúsh biriktirýdiń mańyzyna nazar aýdardy.
«Prezıdent Qasym-Jomart Toqaevtyń bastamasymen elimizde keshendi reformalar iske asyrylyp jatyr. Basty maqsat – ádiletti memleket, tıimdi ekonomıka jáne jaýapty basqarý júıesin qalyptastyrý. Memleket basshysy «Turkistan» gazetine bergen suhbatynda elimizdiń qazirgi ahýalyna jáne aldaǵy damý baǵdaryna keńinen toqtaldy. Prezıdenttiń barlyq bastamasy elimizdi ádiletti, demokratııalyq, ashyq memleketke aınaldyrýǵa baǵyttalǵan. Sondyqtan Memleket basshysy júktegen mindetterdi sapaly iske asyrý úshin senatorlar men máslıhat depýtattarynyń júıeli ózara is-qımylyn jáne birlesken jumysyn belsendi túrde jalǵastyra beremiz», dedi M.Áshimbaev.
Sonymen qatar Senat tóraǵasy Memleket basshysynyń tapsyrmasymen ázirlenip, fıskaldyq jáne salyq saıasaty tolyǵymen qaıta qaralǵan jańa Bıýdjet, Salyq kodeksteriniń, sondaı-aq qabyldanǵan basqa da zańdardyń mańyzyna nazar aýdardy. Palata spıkeri Prezıdenttiń óńirlerdi ortalyqsyzdandyrýdy jáne olardyń derbestigin arttyrýdy kózdeıtin buryn-sońdy bolmaǵan baǵdary men «Qýatty óńirler – qýatty el» qaǵıdatynyń negizgi mánin de tilge tıek etti. Mundaı qadam ózekti máselelerdi jedel sheshý jolynda bıýdjettik derbestikti jáne qabyldanǵan sheshimder úshin jaýapkershilikti arttyrady, sondaı-aq jergilikti bılik ınstıtýttarynyń rólin nyǵaıtady.
«Memleket basshysy Qasym-Jomart Toqaev aımaqtardyń quzyretin kúsheıtip, birqatar ókilettikti ortalyqtan óńirlerge berýdi mańyzdy mindet etip belgiledi. Osyǵan baılanysty jergilikti atqarýshy organdardyń bıýdjettik derbestigin keńeıtý úshin aýqymdy ózgerister atqarylyp jatyr. Sonyń nátıjesinde salyqtar men tólemderdiń 25 túri jergilikti deńgeıge, onyń ishinde aýdandar men aýyldarǵa berildi. Eń osal aımaqtarǵa standartty damý deńgeıine jetý úshin kóbirek resýrstar beriledi. Mundaı tásil ınfraqurylymdyq olqylyqtardy barynsha azaıtýǵa jáne eldi mekenderdiń damýyn naqty josparlaýǵa jol ashady. О́ńirlerdiń kiristeriniń 70 paıyzy aýdandyq deńgeıde jáne oblystyq mańyzy bar qalalarda shoǵyrlanǵan. Bul – jergilikti ákimderdi bıznes ortany damytýǵa jáne tabys bazasyn ulǵaıtýǵa yntalandyratyn qadam. Osyndaı aýqymdy jumysta máslıhattarǵa úlken jaýapkershilik júkteledi. Bul rette Memleket basshysy bergen tapsyrmalardyń sapaly ári ýaqtyly iske asyrylýyn baqylaýdy kúsheıtýdiń mańyzy zor», dedi Senat tóraǵasy.
Kezdesýde M.Áshimbaev saıası jańǵyrý jolyndaǵy taǵy bir mańyzdy másele – parlamenttik reforma týraly aıtty.
«Prezıdent halyqqa arnaǵan Joldaýynda bir palataly Parlamentke kóshý máselesin qoǵam men sarapshylar talqylaýyna shyǵarýdy usyndy. Bul bastama demokratııalyq ınstıtýttar men tetikterdi nyǵaıtýǵa baǵyttalǵan dáıekti reformalardyń qısyndy jalǵasy ekeni anyq. Osy jolda keńeıtilgen ókilettikterge ıe Parlament mańyzdy rólderdiń birin atqarady. Atalǵan reforma aıasynda Konstıtýsııanyń 40-qa jýyq babyna ózgerister engiziledi. Bul másele boıynsha túpkilikti sheshim halyqtyń pikirin eskere otyryp, referendým arqyly qabyldanady. Jalpy, parlamenttik reforma ókildi bılik tarmaǵyn odan ári tıimdi, ıkemdi jáne zamanaýı syn-qaterlerge tótep beretin júıe retinde kúsheıtýdi kózdeıdi», dedi palata spıkeri.
M.Áshimbaev Qyzylorda oblysynyń ekonomıkalyq ósý keleshegi men qarqynyna nazar aýdaryp, jańa damý tetikterin jetildirýdiń jáne azamattardyń ál-aýqatyn arttyrýdyń mańyzdy ekenin atap ótti. Sonymen qatar kezdesýge qatysýshylar oblystyń ınvestısııalyq áleýetine, osy baǵyttaǵy negizgi mindetterge, olardyń ereksheligine toqtala kele, iske asyrylyp jatqan birqatar jobanyń tıimdiligin jáne ınfraqurylymdy jańǵyrtýǵa, joldar jelisin, sý men ınjenerlik júıelerdi jańartýǵa qatysty máselelerdi talqylady.
О́ńirdiń kreatıvti jastarymen kezdesýde eldi jańǵyrtý úderisinde bilimdi jas býynnyń róline, olardyń boıyna jasampaz qundylyqtardy, jaýapkershilik pen progressıvti ıdeıalardy sińirýdiń mańyzyna jáne óskeleń urpaqty júıeli qoldaýǵa basa mán berildi. Atap aıtqanda, úzdiksiz damý, sıfrlyq saýatty arttyrý men ozyq tehnologııalardy ıgerý jóninde keńinen sóz boldy.
Sapar aıasynda senatorlar Qazaqstan halqy Assambleıasynyń múshelerimen kezdesti jáne fızıka-matematıka baǵytyndaǵy mektep-ınternattyń qyzmetimen tanysty. Atalǵan bilim ordasy zańsyz ıemdengen aktıvterden qaıtarylǵan qarajatqa Memleket basshysynyń tapsyrmasymen salynǵan. Daryndy balalarǵa arnalǵan oqý ornynda naqty ǵylymdarmen qatar aǵylshyn tilin tereńdetip oqytýǵa erekshe kóńil bólinedi.
Buǵan qosa Senat depýtattary Inklıýzıvti sport ortalyǵyna baryp, jastarmen jáne oqytýshylarmen kezdesti. Bul ortalyq erekshe qajettilikteri bar balalar men jastarǵa túrli qyzmetter kórsetedi. Olardyń qatarynda ortaǵa beıimdelý, túzetý-damytý jáne áleýmettik-psıhologııalyq qoldaý sııaqty mańyzdy salalar bar.
Senatorlardyń «Tumar» shaǵyn ónerkásiptik aımaǵynyń ókilderimen kezdesýinde shaǵyn jáne orta bıznesti damytý men qoldaýǵa qatysty ózekti máseleler talqylandy. Sondaı-aq depýtattar oblystyq tarıhı-ólketaný mýzeıiniń jáne áýejaıdyń jańa termınalynyń qyzmetimen tanysty.
