Sýret: instagram.com/senate_kz
Senat depýtaty Sáken Arýbaev jumys saparymen Jambyl oblysynyń Jambyl aýdanynda bolyp, áleýmettik jáne ınvestısııalyq jobalardy iske asyrý barysymen tanysty. Álı aýylynda jasóspirimderge arnalǵan aýdandyq kitaphana men muraǵatty jáne bos ýaqyt keshenin aralap kórdi. Bul nysandar bıýdjet qarjysy esebinen paıdalanýǵa berilgen jáne mádenı ortany damytýǵa, jastardy qoldaýǵa, jumys oryndaryn ashýǵa baǵdarlanyp otyr. Depýtat sonymen qatar turǵyn úıge kezekte turǵan azamattar men otbasylardyń áleýmettik osal toptary úshin 120 páterli turǵyn úı qurylysynyń barysymen tanysty.
Senatorlar Amangeldi Esbaı men Ǵalıasqar Sarybaev Jetisý oblysynyń Panfılov aýdanynda bolyp, áleýmettik-ekonomıkalyq jaǵdaıdy baqylap, memlekettik baǵdarlamalardy iske asyrý barysyn kózben kórip qaıtty. Jumys sapary Memleket basshysy Q.Toqaevtyń jaqynda «Turkistan» gazetine bergen suhbatynda belgilengen mindetter aıasynda ótti. Onda óńirlerdiń teńgerimdi damýy, áleýmettik-ekonomıkalyq teńsizdikterdi qysqartý, halyqtyń ómir súrý sapasyn arttyrý, sondaı-aq bılik organdarynyń azamattardyń naqty suranystaryn sheshýge baǵyttalýyn kúsheıtý máseleleri qamtyldy.
Al senator Talǵat Júnisov Aqmola oblysyndaǵy áleýmettik ınfraqurylym nysandaryn aralap, Krasnyı Iаr aýylynda densaýlyq saqtaý jáne sport mekemeleriniń qyzmetimen tanysty. Memlekettik baǵdarlamalardyń iske asyrylýyna monıtorıng júrgizý, áleýmettik nysandardyń qurylysy men jumys isteý sapasyn baqylaý, sondaı-aq turǵyndarmen jáne eńbek ujymdarymen kezdesýler ótkizý sapardyń basty maqsaty boldy. Sporttyq ınfraqurylymdy damytýǵa erekshe nazar aýdaryldy.
Sapar aıasynda Alǵashqy medısınalyq-sanıtarlyq kómek ortalyǵyna, sondaı-aq Kókshetaý kópsalaly aýrýhanasynyń pallıatıvtik bólimshesinde bolyp, medısına qyzmetkerlerimen kezdesý barysynda medısınalyq qyzmetterdiń sapasy men qoljetimdiligi, dárilik zattarmen qamtamasyz etilýi, kadr áleýeti jáne eńbek jaǵdaılary máseleleri talqylandy.
Senat depýtattary Álibek Náýtıev pen Saǵyndyq Luqpanov Atyraý oblysyndaǵy Qyzylqoǵa aýdanyna at basyn buryp, aýdandyq máslıhat depýtattary, qoǵamdyq keńes músheleri, aýyldyq okrýg ákimderi, sharýa qojalyqtarynyń ókilderi jáne jergilikti turǵyndarmen kezdesýler ótkizdi. Depýtattar Senattyń byltyrǵy jumysy týraly habardar etip, qabyldanǵan zańdar, sondaı-aq parlamenttik qyzmettiń negizgi baǵyttary týraly aıtty.
Memleket basshysy Q.Toqaevtyń «Turkistan» gazetine bergen suhbatynda aıtqan tujyrymdarǵa erekshe nazar aýdaryldy. Prezıdent aýyl sharýashylyǵy salasyn qarjylandyrýdyń tıimdiligin arttyrý, mal sharýashylyǵy salasyndaǵy jumysty kúsheıtý, sondaı-aq kooperasııany odan ári damytý qajettigin atap ótkeni aıtyldy.
Senatorlar Álı Bektaev, Murat Qadyrbek pen Alısher Satvaldıev Túrkistan oblysynyń Maqtaaral jáne Jetisaı aýdandaryna baryp, halyqpen kezdesýler ótkizip, birqatar áleýmettik mańyzy bar ınfraqurylymdyq nysannyń qyzmetimen tanysty. О́ńirdegi jumys Memleket basshysynyń suhbatynda belgilengen tásilderdi eskere otyryp quryldy. Prezıdent aıtqandaı, óńirlik damýdyń mazmundylyǵy jáne iske asyrylyp jatqan jobalardyń – ınvestısııalyq bastamalardan bastap, azamattardyń ómir súrý sapasyn arttyrýǵa tikeleı áser etýge tıis áleýmettik baǵdarlamalarǵa deıingi praktıkalyq qaıtarymdylyǵynyń mańyzy sóz boldy. Osyǵan baılanysty senatorlar iri ınvestısııalyq jobalarǵa da, halyqtyń kúndelikti qajettilikterine tikeleı qatysty bazalyq ınfraqurylym men áleýmettik sala máselelerine de nazar aýdardy.
Sondaı-aq olar Maqtaaral aýdanynyń eldi mekenderindegi sýmen jabdyqtaý júıeleriniń jaı-kúıimen tanysty. Turǵyndardyń ortalyqtandyrylǵan aýyzsýmen júz paıyz qamtamasyz etilýine qaramastan, birqatar aýylda tozǵan jelilerdi jańartý qajettiligi saqtalyp otyr. Aqjol aýylynda senatorlar sý qubyry ınfraqurylymyn qaıta qurý barysyn tekserip, sýmen jabdyqtaý júıelerin jańǵyrtýdyń qadamdaryn talqylady.
Depýtattar Arman О́teǵulov pen Lázzat Rysbekova Batys Qazaqstan oblysynyń Qaztalov aýdanyna bardy. Sapar barysynda olar áleýmettik ınfraqurylym nysandarynyń jaı-kúıimen tanysyp, aýyldyq aýmaqtardy damytýdyń ózekti máselelerin talqylady. Qonys aýylyndaǵy 60 oryndyq jalpy bilim beretin mektepke at basyn buryp, keıingi jyldary aýdanda bilim berý ınfraqurylymyn jańartý sharalary dáıekti túrde iske asyrylyp jatqany atap ótildi. Tórt jyl ishinde bes jańa mektep paıdalanýǵa berilgen. Senatorlar oqý ornynyń materıaldyq-tehnıkalyq bazasymen tanysyp, aýyldyq jerlerdegi bilim berý júıesin odan ári damytý keleshegin talqylady.
Buǵan qosa senator Sultan Dúısembınov Jetisý oblysyndaǵy Sarqant aýdanynda, Sovetbek Medebaev Ulytaý oblysynda, Súıindik Aldashev pen Bekbol Orynbasarov Aqtaý qalasynda bolyp, ınfraqurylymdyq jáne ǵylymı-ekologııalyq jobalardy iske asyrý barysymen tanysty.
Mańǵystaý oblysyna barǵan depýtattar Memleket basshysynyń tapsyrmasy boıynsha qurylǵan Kaspıı ǵylymı zertteý ınstıtýtynyń basshylyǵymen kezdesti. Júzdesý barysynda ınstıtýttyń materıaldyq-tehnıkalyq bazasyn nyǵaıtý, sondaı-aq Kaspıı teńizi deńgeıin monıtorıng jasaý, óńirdiń ekologııalyq jaǵdaıy jáne teńiz resýrstaryn utymdy paıdalaný salasyndaǵy ǵylymı jobalardy iske asyrý máseleleri talqylandy. Jabdyqtardy jańǵyrtý jáne ǵylymı ınfraqurylymdy odan ári damytý qajettigin jetkizdi.
