Sýret: primeminister.kz
Onyń aıtýynsha, Prezıdent tarapynan dáıekti qoldaýdyń arqasynda densaýlyq saqtaý salasyna jumsalatyn memlekettik shyǵyndar keıingi jyldary úsh esege jýyq ósip, 2025 jyly 3 trln teńgege jetken. Bul medısınalyq kómektiń kólemin edáýir keńeıtýge, ınfraqurylymdy aýqymdy túrde jańǵyrtýǵa ári medısınalyq uıymdardyń materıaldyq-tehnıkalyq bazasyn jańartýǵa múmkindik berdi.
Máselen, respýblıkalyq mańyzy bar negizgi nysandar paıdalanýǵa berildi. Olar – Ulttyq onkologııa ortalyǵy, Astanadaǵy shuǵyl medısına ortalyǵy, sondaı-aq Almatydaǵy Ulttyq juqpaly aýrýlar ortalyǵy.
«Memleket basshysynyń tapsyrmasy boıynsha júzege asyp jatqan aýyldyq densaýlyq saqtaý salasyn jańǵyrtý jónindegi aýqymdy joba aıaqtalyp keledi. Qazirdiń ózinde aýyldyq jerlerde 650-den astam medısınalyq nysan paıdalanýǵa berildi, bul qala men aýyl arasyndaǵy alshaqtyqty edáýir azaıtty», dep atap ótti T.Sultanǵazıev.
Uzaq ýaqyttan beri alǵash ret tarıftik saıasat qaıta qaraldy. Bosandyrý men pedıatrııa tarıfteri kóterildi, aýrýlardyń aldyn alýǵa, erte dıagnostıkalaýǵa ári medısınalyq qyzmetterdiń sapasyn arttyrýǵa basa nazar aýdaryldy. Klınıkalyq baǵyttarda eleýli progreske qol jetkizildi, ana men balanyń densaýlyǵyn saqtaý júıesi nyǵaıtyldy. Onkologııalyq qyzmet belsendi damyp keledi, buryn negizinen shetelde qol jetimdi bop kelgen joǵary dáldiktegi ári jumsaq emdeý ádisteri engizilip jatyr.
Dárilik saıasatqa degen jańasha kózqaras dári-dármekpen qamtamasyz etýdiń turaqtylyǵyn arttyryp, bıýdjet qarajatyn aıtarlyqtaı únemdeýge múmkindik berdi. Memleket basshysynyń Qazaqstan halqyna Joldaýynda belgilep bergen strategııalyq basymdyq retinde sıfrlandyrýǵa erekshe nazar aýdarylady.
«Salada «eDensaulyq» ekojúıesi qalyptasyp keledi, dárigerdi qoldaý men medısınalyq kómektiń sapasyn arttyrý quraly retinde jasandy ıntellekt negizindegi sheshimder engizilip otyr», dedi birinshi vıse-mınıstr.
Buǵan qosa, Parlament Memleket basshysynyń tapsyrmasy boıynsha ázirlengen medısına qyzmetkerlerin qorǵaý týraly zańnamaǵa engizilgen túzetýlerdi maquldady. Qyzmettik mindetterin atqarý kezinde medısına qyzmetkerleri men jedel járdem júrgizýshilerine qatysty jasalǵan zorlyq-zombylyq úshin jeke qylmystyq jaýapkershilik engizilip jatyr, sondaı-aq dárigerlerdiń kásibı jaýapkershiligin saqtandyrý tetigi iske qosyldy. Áleýmettik qoldaý sharalarynyń arqasynda dárigerlerdiń tapshylyǵy 19%-ǵa, orta medısınalyq personal 7%-ǵa, aýyldyq jerlerde 16%-ǵa tómendedi.
«Bıyldan bastap ınfeksııalyq qyzmetter men jedel medısınalyq járdem qyzmetkerleriniń jalaqysyn arttyrý qarastyrylǵan, al dárigerlerge qatysty zorlyq-zombylyq úshin jaýapkershilik kúsheıtiledi. Saqtandyrý modeline kóshýdi, halyqty qamtý kólemin keńeıtýdi ári medısınalyq qyzmetter sapasyn memlekettik baqylaýdy qalpyna keltirýdi kózdeıtin Mindetti áleýmettik medısınalyq saqtandyrý júıesin jetildirý jónindegi zań qabyldandy», dedi T.Sultanǵazıev.
Salany damytýdyń strategııalyq basymdyqtary aıqyndaldy. Densaýlyq saqtaýdy damytýdyń 2029 jylǵa deıingi tujyrymdamasy jáne Medısınalyq kómektiń sapasyn basqarýdyń keshendi jospary ázirlendi.
Vıse-mınıstr atap ótkendeı, qabyldanyp jatqan sharalar aıtarlyqtaı nátıje bere bastady. Máselen, halyqtyń boljamdy ómir súrý uzaqtyǵy 75,8 jyldy quraıdy, ólim-jitim kórsetkishteri tómendep jatyr. Jalpy ólim-jitim 2,6%-ǵa, náreste ólimi 18%-ǵa qysqardy, al elimiz halyqaralyq reıtıngilerdegi óz pozısııasyn jaqsarta otyryp, adam damýy ındeksinde jeti tarmaqqa kóterildi.
