Foto: Astana qalasynyń ákimdigi
Qala ákimdiginiń málimetinshe, ótken túnde qaladan 3 146 aýyr júk kóliginiń reısimen 42 myńnan astam tekshe metr qar shyǵaryldy.
9 qańtar kúni tańerteńgi aýysymda qar tazalaý jumystaryna 3 myńnan astam jol jumysshysy jáne 1 500-den asa arnaıy tehnıka jumyldyryldy.
Jalpy qys bastalǵaly beri qaladan qar polıgondaryna 155 982 reıspen eki mıllıon tekshe metrden astam qar shyǵarylǵan.
«Eń aldymen negizgi kóshe magıstraldary men qoǵamdyq kólik baǵyttary tazartylyp jatyr. Odan keıin qozǵalys qarqyny ortasha aýlalarda, alańdarda, jaıaý júrginshiler joly men aıaldamalarda qar tazalaý jumysy júrgiziledi.
Qala turǵyndarynyń qaýipsizdigin qamtamasyz etý maqsatynda joldarǵa, jaıaý júrginshiler joly men kóshelerge tehnıkalyq tuz sebilip jatyr. Bul jumys ta táýlik boıy atqarylady», delingen qala ákimdigi taratqan habarlamada.
Sonymen qatar, aýla aýmaqtarynyń tazalyǵyn qamtamasyz etý páter ıeleri kooperatıvi men múlik ıeleri birlestiginiń mindeti. Atalǵan uıymdar turǵyndardyń qaýipsizdigi men qolaılylyǵy úshin aýlalardy qar men muzdan ýaqytyly tazalaýy tıis.
Buǵan deıin qala ákimdigi Astana turǵyndarynan aýlalaryn jańartýǵa ótinim qabyldaý bastalǵanyn habarlaǵan.
Eske salaıyq, aldaǵy demalys kúnderi Astanada aýyl sharýashylyǵy jármeńkesi ótedi.
