Foto: mádenıet mınıstrligi baspasóz qyzmeti
Klassıkalyq sıýjet barlyq qoıylymǵa ortaq bolǵanymen, ár teatr Chaıkovskııdiń mýzykalyq murasyn ózindik kórkemdik sheshimmen usyndy. Sahnalyq plastıka, vızýaldyq til, ártisterdiń emosııalyq oıyny men rejısserlik kózqaras ártúrli bolǵandyqtan, ár kórermen ár qoıylymnan bólek áser aldy.
«Astana Opera» teatrynda baletmeıster Iýrıı Grıgorovıch qoıǵan «Shelkýnchık» sahnalandy. Spektakldiń aıryqsha saltanaty men kórkemdik qýatyn Sımon Vırsaladzeniń ssenografııasy men kostıýmderi tolyqtyra tústi. Aýqymdy sahnalyq sheshimder men sán-saltanaty jarasqan kıimder kórermendi ertegi álemine jetelep, naǵyz teatr ǵajaıybyn sezindirdi. Al «Astana Balet» teatry kórermenge Vasılıı Vaınonen redaksııalap, Altynaı Asylmuratova sahnalaǵan «Shelkýnchık» nusqasyn usyndy. Bul qoıylymda bıdiń jeńildigi men qımyldardyń aıqyndyǵy erekshe baıqalady. Yrǵaqty, názik plastıkasy jas kórermenge jańa jyldyq shattyq pen kóterińki kóńil-kúı syılady.
Abaı atyndaǵy Qazaq ulttyq opera jáne balet teatrynyń sahnasynda «Shelkýnchık» – maýsymnyń eń kóp kútiletin spektaklderiniń biri. Uzaq jyldar boıy repertýardan túspeı kele jatqan bul tarıhı balet Vaınonen nusqasynda qoıylyp, 2015 jyly jańartylǵan. Munda klassıkalyq dástúr men zamanaýı teatrlyq sheshimder úılesim taýyp, kórkemdik tutastyq qalyptastyrady.
Jyl saıyn sahnaǵa oralatyn «Shelkýnchık» baleti kórermendi klassıkalyq ónerdiń asyl qundylyqtarymen qaýyshtyryp, qysqy merekeniń ajyramas sımvolyna aınalyp keledi.
