Foto: Depositphotos.com
Abaı oblysynda arnaıy áleýmettik qyzmetterge muqtaj balalardy qoldaý ortalyǵy kámeletke tolmaǵan tárbıelenýshiniń múddesi úshin sotqa talap aryz túsirdi.
Sot málimetinshe, jetim bala turǵyn úı kezeginde turǵan. Alaıda Abaı oblysyndaǵy ákimshilik-aýmaqtyq ózgeristerden keıin jańa kezek tizimderin qalyptastyrý barysynda ol týraly málimetter joǵalyp ketken.
«Janasemeı aýdanynyń TKSh bólimi men Semeı qalasynyń turǵyn úı qatynastary bóliminiń mamandary qyzmettik mindetterine salǵyrt qarap, jetim balanyń quqyqtarynyń buzylýyna jol bergeni anyqtaldy. Sot talap aryzdy qanaǵattandyryp, laýazymdy tulǵalardyń áreketin zańsyz dep tanydy», delingen habarlamada.
Sot sheshimimen «Otbasy bankke» kámeletke tolmaǵan balany 2016 jyldan bastap turǵyn úı esebine qoıý týraly joǵalǵan málimetterdi qalpyna keltirý mindetteldi. Qarjy uıymy bul talapty bir aı ishinde oryndady.
