Dúnıejúzilik reıtıngte besinshi orynda turǵan elimizdiń birinshi raketkasy Elena Rybakına 2024 jyly dál osy jarystyń jeńimpazy atanǵan bolatyn. Fınalda ol Arına Sobolenkoǵa san soqtyrǵan edi. Osy qos oıynshy WTA-nyń byltyrǵy jylǵy qorytyndy týrnırinde de bas júldeni ózara sarapqa saldy. Bul básekede de jerlesimiz jeńiske jetti. Reıtıngte joǵary oryndardyń birin ıelengendikten, Elena birinshi aınalymda bos boldy. Ekinshi kezeńde qytaılyq Chjan Shýaıǵa 6:3, 7:5 esebimen shań qaptyrǵan ol úshinshi aınalymda ıspanııalyq Paýla Badosamen sheberlik baıqasty. Kezinde álemniń ekinshi raketkasy bolǵan Pıreneı túbeginiń ókili jerlesimizge jarytyp qarsylyq kórsete almady. Esep – 6:3, 6:2. Shırek fınalda Rybakına WTA reıtınginde 20-orynda turǵan chehııalyq Karloına Mýhovadan oıda-joqta utylyp qaldy – 2:6, 6:2, 4:6. Osy mejege jetkeni úshin otandasymyz 195 reıtıngtik upaı alyp, 37 640 dollardy ámııanyna saldy.
Elimizdiń ekinshi raketkasy Iýlııa Pýtınseva da Brısbende boı kórsetti. Tusaýkeser kezdesýinde AQSh oıynshysy Heılı Baptısti qapy qaldyrǵan ol kelesi kúni ýkraınalyq Marta Kostıýkpen kezdesip, oǵan 6:7, 1:6 esebimen ese jiberdi.
Jasyl qurlyqta WTA-men qosa ATR týrnıri de qatar ótip jatyr. Bul jarysta Aleksandr Shevchenko irikteýdiń alǵashqy aınalymynda súrindi. Ol belgııalyq Rafael Kollınonge jol berdi – 5:7, 4:6.
Juptyq saıysta Anna Danılına birshama jaqsy óner kórsetti. Serbııalyq Aleksandra Krýnıchpen birge ol amerıkalyq Dezıra Kravchık pen Sofıa Kenındi, reseılik Ekaterına Aleksandrova men Mırra Andreeva jubyn utyp, jartylaı fınalǵa deıin jetti. Alaıda bul mejede olardy Ispanııa men Aýstralııa ókilderi Krıstına Býksha men Ellen Peres toqtatty.
