Shetelden jumys kúshin tartýǵa beriletin ruqsattar óz aldyna birneshe sanatqa bólinedi. Mysaly, joǵarydaǵy tizimniń ishinde basshylar men olardyń orynbasarlaryna 537 ruqsat berilgen. Bul – birinshi sanat. Ekinshi sanat boıynsha, qurylymdyq bólimshelerdiń basshylaryna 2 244 ruqsat berilipti. Tartylǵan shetel jumys kúshiniń negizgi bóligi úshinshi, tórtinshi sanattarǵa tıesili. Munda mamandarǵa, bilikti jumysshylar sanatyndaǵylarǵa ruqsat beriledi. Naqty sandy aıtsaq, mamandardyń úlesi – 3 784, bilikti jumysshylar – 1 271 adam. Sondaı-aq maýsymdyq jumystarǵa 2 299 adam, korporatıvtik aýystyrý aıasynda 3 970 adam tartylǵan.
Resmı aqparatqa úńilsek, elimizde naq qazir shetel jumys kúshin paıdalanatyn
1 817 jumys berýshi bar. Olardyń qanatynyń astynda sheteldikterden bólek, 334,4 myńnan astam ózimizdiń el azamaty jumys isteıdi. Bul degenińiz, jalpy qyzmetkerler sanynyń 96%-na para-par. Osyǵan qarap, salystyrmaly túrde shetel jumysshylarynyń úlesi bizde az dep aıtýǵa bolady.
Qyzmet túrleri jóninen qurylys salasynda sheteldikter kóp. Qurylysta 4 993 shetel azamaty jumys istese, aýyl, orman, balyq sharýashylyǵynda – 2 316 adam, taý-ken ónerkásibi, karerlerdi qazý baǵytynda – 1 235 adam, óńdeý ónerkásibinde 1 155 adam eńbek etedi. Eńbek mıgranttary keletin negizgi elderdiń kóshin Qytaı bastap tur. Kórshi elden 5 604 adam resmı jumys isteýge kelse, О́zbekstannan – 2 110 adam, Túrkııadan – 1 036 adam, Úndistannan – 943 adam kelgen.
Kópshilik bile bermes, Eńbek jáne halyqty áleýmettik qorǵaý mınıstrligi ishki eńbek naryǵyn qorǵaý maqsatynda jyl saıyn respýblıkaǵa shetel mamandaryn tartýǵa kvota bóledi. Byltyr jalpy kvota respýblıkadaǵy jumys kúshiniń sanyna qatysty 0,2% mólsherinde, 14,8 myń birlik bolyp belgilengen. Naýryz aıynan bastap jergilikti atqarýshy organdardyń ótinimderine baılanysty mınıstrdiń buıryǵymen kólem 16,5 myń birlikke deıin ulǵaıǵan. Tamyzda maýsymdyq sheteldik jumysshylardyń eńbek qyzmetin iske asyratyn kásipter tizbesiniń keńeıýine baılanysty mınıstrdiń buıryǵymen jalpy kvota respýblıkadaǵy jumys kúshi sanyna qatysty 0,25%, 19,4 myń birlik mólsherinde belgilenipti. Búginde óńirlerdiń qajettiligin eskere otyryp, bul kvota 16,7 myń birlikke deıin qysqaryp otyr.
