Foto: Kevin Dietsch/Getty Images
Truth Social jelisinde jarııalanǵan sýrette Tramptyń 2026 jylǵy qańtardan bastap Venesýelanyń prezıdenti mindetin atqaryp otyrǵany kórsetilgen. Qujatta onyń bul qyzmetke 2026 jyldyń qańtarynda taǵaıyndalǵany jazylǵan. Sonymen qatar onyń AQSh-tyń prezıdenti laýazymy da saqtalatyny kórsetilgen.
Eske salaıyq, 2025 jylǵy jeltoqsanda AQSh Venesýelaǵa qarsy operasııa júrgizip, respýblıka astanasy Karakasta prezıdent Nıkolas Madýro men onyń jubaıyn qolǵa túsirgen bolatyn. Keıin Madýronyń Nıý-Iorktegi Brýklın tergeý ızolıatoryna jetkizilgeni belgili boldy.
Donald Tramp «AQSh-tyń barlyq jaýlaryna» Venesýeladaǵydaı operasııa júrgizilýi múmkin ekenin eskertti.
Osy kúni Nıý-Iorkte Venesýela prezıdentine qatysty sot isi boıynsha alǵashqy tyńdaý aıaqtaldy. Madýroǵa «esirtki terrorızmine baılanysty sóz baılasý, kokaın kontrabandasy, pýlemetter men jarylǵysh qurylǵylardy saqtaý jáne olardy AQSh-qa qarsy qoldanýdy josparlaý» aıyptary taǵylyp, tórt ret ómir boıyna bas bostandyǵynan aıyrý jazasy qaýpi tóndi.
AQSh Kongresi Venesýelaǵa qatysty áreketi úshin Trampty aıyptady
Sotta Madýro ózin «áli de Venesýelanyń prezıdentimin» jáne «taǵylǵan aıyptar boıynsha kináli emespin» dep málimdedi. Onyń jubaıy da óz kinásizdigin alǵa tartty.
Sot saıasatkerdi kelesi sot otyrysyna 17 naýryzda kelýge mindettep, konsýldyq qyzmetkerlerdiń qabyldaýyna ruqsat berdi. Qorǵaý tarapy Venesýela prezıdentin kepilmen bosatýǵa qol jetkizýge nıetti ekenin aıtty.
Keıinirek Delsı Rodrıges Venesýelanyń ýaqytsha prezıdenti bolyp taǵaıyndaldy. Alǵashynda ol AQSh-tyń áreketterin qatań aıyptap, Madýrony bosatýdy talap etken. Alaıda keıin Trampqa joldaǵan úndeýin jarııalap, venesýelalyqtardyń «soǵysqa emes, beıbit ómirge laıyq ekenin» aıtty. Sondaı-aq AQSh úkimetin «yntymaqtastyq baǵdarlamasy aıasynda birlesip jumys isteýge» shaqyrdy.
Bul málimdeme Tramp Venesýela AQSh-pen yntymaqtaspasa, jańa soqqy berýge buıryq berýi múmkin ekenin eskertkennen keıin jasaldy. Sonymen qatar AQSh prezıdenti Rodrıgeske de qoqan-loqy jasap, «eger ol durys sheshim qabyldamasa, jazasy Madýrodan da aýyr bolýy múmkin» ekenin aıtty.
