Bılik ókilderi Iran Islam Respýblıkasyn qoldaýǵa arnalǵan búkilhalyqtyq sherýler ótkizýge shaqyrdy. HRANA quqyq qorǵaý uıymynyń derekterine sáıkes, eldegi tártipsizdikter saldarynan 500-den astam adam qaza tapqan, olardyń ishinde qaýipsizdik kúshteriniń 48 qyzmetkeri bar. Sonymen qatar eki aptaǵa sozylǵan narazylyqtar barysynda 10 600-den astam adam tutqyndalǵan.
Jaralanǵandar tym kóp: Iran dárigerleri narazylyqtarǵa baılanysty dabyl qaqty
Narazylyq aksııalary 28 jeltoqsanda baǵanyń kúrt ósýine qarsy bastalyp, keıin 1979 jyldan beri bılik etip kele jatqan klerıkaldyq rejımge (saıası bıliktiń din qyzmetkerleriniń qolynda bolýy) qarsy qozǵalysqa ulasqan. Iran bıligi tártipsizdiktiń órshýine AQSh pen Izraıldi aıyptady. AQSh prezıdenti Donald Tramptyń aralasý jónindegi qoqan-loqysyna jaýap retinde Iran parlamentiniń spıkeri Muhammed Baǵer Qalıbaf Iranǵa qarsy kez kelgen áreket amerıkalyq bazalar men Izraılge qarsy jaýap sharalaryna alyp keletinin eskertti.
Beısenbiden beri elde ınternet óshirilgen, bul bolyp jatqan oqıǵalar týraly aqparat alýdy qıyndatyp otyr. Soǵan qaramastan áleýmettik jelilerde kóshelermen júrip, urandatqan adamdar beınelengen narazylyq vıdeolary tarady. Jeksenbi kúni memlekettik telearna qaza tapqandardyń máıitteri kórsetilgen kadrlardy usynyp, olardyń «qarýly terrorısterdiń» qurbany bolǵanyn málimdedi.
AQSh-tyń yqtımal aralasýyna baılanysty Izraıl joǵary daıyndyq rejımine kóshkenimen, ızraıldik áskerı ókilder bul narazylyqtar Irannyń ishki isi ekenin atap ótti. Jaǵdaı áli de kúrdeli kúıinde qalyp otyr, al halyqaralyq qaýymdastyq oqıǵalardyń damýyn muqııat baqylaýǵa aldy.
AQSh-tyń burynǵy dıplomaty ári Iran boıynsha sarapshy Alan Eırdiń pikirinshe, bul narazylyqtardyń bıliktegi elıtany qulatýy ekitalaı.
«Eń yqtımal ssenarıı – narazylyqtar basyp-janshylady, alaıda úkimet bul úrdisten aıtarlyqtaı álsirep shyǵady», dedi ol Reuters agenttigine.
Onyń aıtýynsha, ırandyq elıta áli de birtutas kórinedi, al uıymdasqan oppozısııa joq.
Irannyń memlekettik telearnasy batystaǵy Gacharan men Iаsýdj qalalarynda narazylyqtar kezinde qaza tapqan qaýipsizdik kúshteri qyzmetkerlerin eske alýǵa arnalǵan jerleý rásimderin kórsetti.
Sondaı-aq qaýipsizdik kúshteriniń 30 qyzmetkeri eldiń ortalyq bóligindegi Isfahan qalasynda jerlenetini, al taǵy altaýy batystaǵy Kermanshahta «búlikshilerdiń qolynan qaza tapqany» habarlandy.
