Foto: ashyq derekkóz
Amerıkalyq The Wall Street Journal basylymynyń habarlaýynsha, keńeske memlekettik hatshy Marko Rýbıo, qorǵanys mınıstri Pıt Hegset jáne armııa basshylyǵy qatysady. Olar prezıdentke Irandaǵy tártipsizdikterge baılanysty birneshe nusqa usynady. Onyń ishinde áskerı soqqy berý, kıbershabýyl jasaý jáne jańa sanksııalar engizý de bar.
Sondaı-aq AQSh Iranda ınternet óshirilgen jaǵdaıda, sherýshilerdiń baılanysyn saqtaý úshin Starlink spýtnıktik júıesin jiberý múmkindigin de qarastyryp otyr. Qazirgi ýaqytta Pentagon Iran shekarasyna qosymsha ásker ákelgen joq.
Tramp Maskten Irandaǵy ınternet baılanysyn qalpyna keltirýdi ótinbek
Buǵan deıin Donald Tramp AQSh Irandaǵy jaǵdaıǵa beıjaı qaramaıtynyn jáne qajet bolsa kúsh qoldaný múmkindigin de joqqa shyǵarmaıtynyn aıtqan.
Irandaǵy jaǵdaı jeltoqsan aıynyń sońynda ýshyǵa tústi. 29 jeltoqsanda Tegeranda ulttyq valıýtanyń kúrt qunsyzdanýyna narazy bolǵan saýdagerler kóshege shyqty. Kelesi kúni olarǵa stýdentter qosyldy. Narazylyq eldiń iri qalalaryna tarady.
8 qańtarda jaǵdaı eń aýyr kezeńge jetti. Resmı derek boıynsha, sol kúni keminde 13 beıbit turǵyn, onyń ishinde úsh jasar bala qaza tapty. Sonymen qatar 38 polısııa men áskerı qyzmetker mert bolǵan. Tegeran bıliginiń málimetinshe, búlikshiler meshitterdi, bankterdi, aýrýhanalar men memlekettik ǵımarattardy órtep, ondaǵan kólikti joıǵan.
Iran bıligi bul oqıǵalarǵa syrtqy kúshterdi, sonyń ishinde AQSh pen Izraıldi aıyptap otyr.
