«Eko taksı» jobasy 2024 jyly Memleket basshysynyń «Taza Qazaqstan» jalpyulttyq ekologııalyq bastamasy aıasynda iske qosylǵan bolatyn. Otandyq servıstiń basty maqsaty – kólik júrgizýshilerine qolaıly jaǵdaı jasaý. Munda ár júrgizýshige bir reıs úshin 60 teńge tólenedi, al tapsyrystyń qalǵan somasy onyń esebine tikeleı túsedi. Júrgizýshilerge úılestirýshi uıymdar arqyly jalaqy men áleýmettik aýdarymdar tólenedi, jumysqa shyqqandar kún saıyn medısınalyq tekserýden ótedi. Servıstiń jumysyn memlekettik organdar qatań baqylaýda ustaıdy.
Depýtat: «Taksı júrgizýshisi» uǵymyn zańnamalyq turǵyda bekitken jón
Májilis depýtaty Murat Ábenov qazir Parlamentte sheteldik agregatorlardyń qyzmeti qyzý talqylanyp jatqanyn, olarda eńbek talaptary jıi buzylatynyn aıtty.
«Komıssııa 25 paıyzǵa deıin jetedi, júrgizýshiler mindetti medısınalyq tekserýden ótpeıdi, áleýmettik jáne zeınetaqy jarnalaryn almaıdy, saqtandyrylmaıdy, baqylaý joq. Al kiris shetelge ketedi. Bul mańyzdy másele», dep atap ótti depýtat.
Sondaı-aq depýtattar Qyzylordadaǵy Prezıdenttik saıabaqty qaıta qurý barysymen tanysty. Jańartý jumystary aıaqtalǵan soń saıabaq kóp fýnksııaly demalys aımaǵyna aınalýǵa tıis. Sóıtip, 300 oryndyq balalar lageri, botanıkalyq baq, sýburqaqtary bar alleıalar, amfıteatr, sport jáne oıyn alańdary, workout oryndary, fýdkort, velojoldar men shaǵyn sý arnalary paıda bolady.
Májilismenderdiń aıtýynsha, sońǵy eki jylda óńirde 200-den astam áleýmettik nysan salyndy, qazir júzge jýyq nysan qaıta jańartylyp jatyr.
