QOSTANAI. 24 aqpan. Qostanaıda «Men densaýlyqty qalaımyn» atty jelaıaqtar jarysy Jeńistiń 70 jyldyǵy men Keńester Odaǵynyń batyry Sultan Baımaǵanbetovtyń týǵanyna 95 jyl tolýyna arnaldy. Bul týraly ng.kz habarlady.
Jarys sońynda uıymdastyrýshylar qatysýshylardyń barlyǵynyń júgirgen jolyn eseptegende, Sultan batyr týǵan Áýlıekólden ol qaza bolǵan Lenıngrad oblysyndaǵy Sınıavıno poselkesine deıingi aralyqpen birdeı, ıaǵnı 2 878 shaqyrym bolady eken. 2 shaqyrym, 5 jáne 10 shaqyrymdyq jarysqa barlyǵy myń qaraly adam qatysty. Ony «AgromashHoldıng» zaýyty, Qostanaı qalalyq deneshynyqtyrý jáne sport bólimi men oblystyq boks federasııasy qoldady. Eki shaqyrymǵa negizinen mektep oqýshylary, bes shaqyrymǵa stýdentter, al on shaqyrymǵa sport ardagerleri men kánigi jelaıaqtar júgirdi. Olardyń arasynda «AgromashHodıng» aksıonerlik qoǵamynyń basqarma tóraǵasy Alekseı Sıdorenko da bar.
Alekseı Sıdorenko: «Men eki jyldan beri trıatlonmen aınalysamyn. Bul sport túri júgirý, sýda júzý jáne velosıped tebýdi qamtıdy. Qazir trıatlon qulashyn keń jaıyp kele jatqan sport. Tarıhı oqıǵany sportpen baılanystyrǵanymyz qandaı ǵanıbet. Batyrlarǵa taǵzym, ári densaýlyq» dedi.
Appaq qardyń ústinde júgirip kelgenderge «Komılfo» shathanasynyń qyzmetkerleri ystyq shaı men jumsaq nan usyndy. Dalaǵa dastarhan jaıdy. Onda «Qazaqstanda jasalǵan», «Shokoladnısa» óndirgen» degen jazýlar men mundalap turdy.
Názıra Járimbetova.
Derek, sýret: ng.kz.
