Abaı Aımaǵambet esimi kópshilikke dástúrli áńgimelerimen tanylyp, qazaq ádebıetiniń qorjynyna «Besinshi jataqhana», «Bilte shamnyń jaryǵy», «Burylysqa jarty qadam qalǵanda» syndy kitaptar salǵan jazýshy. Osydan birer jyl buryn áriptesimizdiń «Burylysqa jarty qadam qalǵanda» atty romany Kemel Toqaev atyndaǵy detektıv janrynda ótken ádebı baıqaýdan bas júlde alǵan edi. Endi, mine, Abaı Aımaǵambettiń kezekti «Tolqyndy kútken bala» atty shyǵarmasy Mádenıet jáne aqparat mınıstrligi men Jazýshylar odaǵynyń «Jańa Qazaqstannyń ádebı-tanymdyq panoramasy» atty jobasy aıasynda jaryq kórip otyr.
Avtor bul týyndysynda Aral teńiziniń qasiretti taǵdyryn ózek etip, 1960–1980 jyldary aralyǵynda ultymyzdyń basynan ótken tarıhty teńizdiń tartylý tragedııasymen astastyra áńgimeleıdi. Iаǵnı jas qalamger tolqyny jaǵany urǵan teńizdi kútken balanyń ańsaryn Aral boıyndaǵy shynaıy ómirdi baılanystyra otyryp boıamasyz sýrettegen.
Jalpy alǵanda, osyǵan deıin jyp-jyly týyndylarymen oqyrman kóńilin arbaǵan qalamger artyq aıtyp, kem túspeı, ár sóılemin tarazyǵa ekshep paıdalanǵanyn baıqadyq. Sondyqtan da sýy tartylyp, ornynda taý-taý qumy qalǵan Aral taǵdyryna, sol ólkege qatysty oqıǵalar men ańyzdarǵa jan bitirgen jazýshynyń talabyna oqyrman retinde rızashylyq bildiremiz. Ekologııalyq apatqa ushyrap, zamana salǵan zardapqa belshesinen batqan halyqtyń úni ádebı shyǵarmadan estildi. Bul ún Araldyń aqıqaty men Aral apatyna berilgen ádebı baǵa bolaryna senemiz.
