Foto: istockphoto.com
QMDB málimetinshe, qasıetti Ramazan aıynyń alǵashqy kúni 19 aqpanǵa sáıkes keledi. Al Qadir túni 16 naýryzdan 17 naýryzǵa qaraǵan túni ótedi.
Elimizdegi musylmandar Oraza aıt merekesin 20 naýryz kúni atap ótedi. Al qasıetti Qurban aıt merekesi bıyl 27-29 mamyr aralyǵynda toılanady.
(Foto: muftyat.kz)
Buǵan deıin QMDB ókilderi hıjrı aılardyń bastalýy halyqaralyq astronomııalyq zertteý ortalyqtarynyń derekterine negizdeletinin atap ótken bolatyn. Osyǵan baılanysty QMDB el turǵyndaryn dinı merekelerdiń naqty kúnderi jańa aıdyń týýyna qaraı bir kún erte nemese kesh belgilenýi múmkin ekeni jóninde eskertti.
QMDB-nyń resmı saıty habarlaǵandaı, Ramazan aıy – musylman kúntizbesindegi toǵyzynshy aı. Bul aı musylmandar úshin eń mańyzdy ári qasıetti kezeń sanalady. «Ramazan» sózi arab tilinen aýdarǵanda «aptap ystyq», «kúıdiretin», «óte ystyq» degen maǵynalardy bildiredi.
Qurban aıt – ıslamdaǵy eń úlken merekelerdiń biri. Ol Mekkege qajylyqtyń aıaqtalýyn bildiredi jáne ıslamnyń bes paryzynyń biri bolyp sanalatyn qajylyqty támamdaýmen baılanysty. Bul mereke adamnyń ımandylyǵy men adamgershilik qasıetterin arttyrýǵa baǵyttalǵan.
