Petropavlda 7 bala gazǵa tunshyǵyp qala jazdady

PETROPAVL. 24 aqpan. Petropavl qalasy Kopaı shaǵynaýdanyndaǵy jekemenshik úılerdiń birinen gazǵa tunshyǵyp qala jazdaǵan 4 pen 14 jas aralyǵyndaǵy 5 bala qutqaryldy. Bul týraly oblystyq tótenshe jaǵdaılar jónindegi departamenttiń baspasóz qyzmeti habarlady. Tekseris barysynda órt sóndirýshiler peshtiń tútindi durys tartpaıtynyn anyqtaǵan. Otanasy tańerteńgilik mezgilde ot jaǵyp, áldebir sharýalarmen shyǵyp ketken. Úıge kelgende balalarynyń basy aýyryp, álsizdenip otyrǵanyn baıqap, jedel medısınalyq kómek shaqyrtqan. Gazǵa tunshyǵa jazdaǵan olar shuǵyl túrde aýrýhanaǵa jetkizilgen. Tórt bala úılerine qaıtarylyp, bireýi qaldyrylǵan. Sondaı-aq, Petropavl qalasynyń «Sovhoznaıa» kóshesinen 2011 jáne 2013 jyly týǵan eki búldirshin gazben ýlanyp, aýrýhanaǵa jetkizilgen. Oǵan úıdi qyzyl jalynǵa oraǵan órt sebep bolǵan. Jyl basynan beri óńirde 109 órt oqıǵasy tirkelip, 15 mıllıon teńge shyǵyn kelgen. 6 adam qaza taýyp, 7 adam túrli dene jaraqatyn alǵan. О́mir Esqalı. Derek: Soltústik Qazaqstan oblystyq tótenshe jaǵdaılar jónindegi departamenttiń baspasóz qyzmeti. Sýret: otyrar.kz.