Memleket basshysy Qasym-Jomart Toqaev 2025 jylǵy naýryzda Býrabaıda ótken Ulttyq quryltaıdyń IV otyrysynda: «Úkimet qolda bar orasan zor derekterdi, sonyń ishinde muraǵattar men anyqtamalyq málimetterdi, ǵylymı zertteýlerdi, ıllıýstrasııalar men fotosýretterdi, mýzykalyq shyǵarmalardy jáne óner týyndylaryn sıfrlyq formatqa kóshirý jumysyn bastap ketti», dedi. Sondaı-aq Prezıdent Ulttyq sıfrlyq muraǵat quryp, ony elimizdegi jáne shetelderdegi neırojúıe jasaýshylardyń erkin paıdalanýyna múmkindik berýdi de usyndy. Memleket basshysynyń mýzykalyq shyǵarmalardy sıfrlyq formatqa kóshirý tapsyrmasyna oraı byltyr «Qazaqstan» teleradıokorporasııasy qazaqtyń ulttyq óneri toptasqan «Asyl mura» aýdıojınaǵyn jaryqqa shyǵardy.
Memlekettik keńesshi Erlan Qarın aýdıokitapqa jazǵan alǵysózinde: «Qazaq halqynyń ár dáýirdegi mádenıetinen syr sherter bul jınaqty basyp shyǵarý ıdeıasyn birneshe jyl buryn oıǵa alǵanymmen, kópshilikke usynýdyń sáti endi tústi. Mundaǵy maqsat – ulttyq óner tarıhyndaǵy esimderdi qaıta jańǵyrtyp, tól murany dáripteý, sonymen qosa ulttyq mýzykalyq qazynamyzdy erte zamannyń únin saǵynǵan aǵa býyn men búgingi jańashyl jastarǵa qoljetimdi formada usyný», degen edi. Shynynda qazirgi jas urpaq dáýlesker kúıshiler Qurmanǵazy, Dáýletkereı, Dına, Seıtekti bilgenimen, solardyń kózin kórip, izin jalǵaǵan, kúıshiligimen daralanǵan Luqpan Muhıtov, Qalı Jantileýov, Jappas Qalambaev sekildi dúldúl dombyrashylardy bile bermeýi, olardyń kúıshilik murasymen de tanys bolmaýy múmkin. Sol sekildi Asan qaıǵydan bastap Kerderi, Súıinbaı, Maılyqoja, Bazar jyraýlardyń mýzykalyq shyǵarmalaryn búgingi kúnge jetkizgen Bákir Tájibaev, Balqashbaı Júsipov, Qanabek Raıysov, Igilik Omarov, t.b. jyrshy-termeshilerdiń baı murasynan habarsyz bolýy ǵajap emes. О́tken men keleshekti jalǵaıtyn altyn kópir ispetti «Asyl mura» aýdıojınaǵy osyndaı birtýar ónerpazdardyń shyǵarmalaryn qazirgi oqyrmanmen qaıta qaýyshtyrady.
Aýdıojınaq «Kúıler», «Jyr-termeler», «Halyq jáne halyq kompozıtorlarynyń ánderi», «Ertegiler», «Besik jyry», «Retro ánder» dep atalatyn alty bólimnen quralǵan. Jınaqqa negizinen «Qazaqstan» telearnasynyń «Altyn» qorynda saqtalǵan shyǵarmalar engen. Atap aıtqanda, aýdıojınaqtan 400 kúı, 300 jyr-terme, 400 halyq jáne halyq kompozıtorlarynyń áni, 100 ertegi, 50 besik jyry, 250 retro án, barlyǵy 1500 tarıhı aýdıoshyǵarmany tyńdaýǵa bolady. Bul shyǵarmalar 20 myńnan astam mýzykalyq aýdıokontent ishinen kóneligi ári sapasyna qaraı tańdap alynyp, toptastyrylǵan. Qurastyrýshylarynyń aıtýynsha, «Asyl mura» aýdıojınaǵyndaǵy eń kóne mýzykalyq mura – ataqty ánshi Ámire Qashaýbaev oryndaǵan «Balqadısha» áni.
Sondaı-aq atalǵan jınaqqa engen 1500 aýdıoshyǵarma «Ozen» mýzykalyq leıblynyń kómegimen Apple Music, Spotify, Yandex Music, YouTube Music sekildi 100-den asa álemdik mýzykalyq platformaǵa ornalastyryldy. Sonymen qatar shyǵarmalardy altynqor.com saıtynan da tyńdaýǵa múmkindik jasaldy. Sonyń arqasynda elimizdegi jáne shetelderdegi tyńdarmandarǵa qazaqtyń mýzykalyq tól ónerin ınternet arqyly tyńdaý qoljetimdi bola tústi. Bul óz kezeginde tól mádenıetimizdiń damýyna serpin berip qana qoımaı, qazaq ónerin bolashaq ıgiligine jaratýǵa jol ashty.
Prezıdent bir sózinde: «Mádenıet – ulttyń tólqujaty. Jahan jurty elimizdi, eń aldymen, ónerimiz arqyly tanyp biledi. Biz – Uly dalada tamyr jaıǵan biregeı mádenıettiń zańdy muragerimiz. Qazaq jerinen shyqqan qaıtalanbas óner ıeleriniń teńdessiz týyndylary tutas ultty tárbıeledi», degen edi. Sondaı tól mádenıetimizdiń dúnıe júzine tanylǵany – biz úshin mereı.
