Bir top erikti jalǵyzilikti zeınetkerler men qarttardyń aýlasyn qardan tazalap, qolǵabys etti. Olar tek fızıkalyq eńbekpen shektelmeı, turmysyna kómek kórsetip, qarııalarmen áńgimelesip, rýhanı qoldaý bildirdi.
– Biz úshin qaqaǵan qysta aýla tazalaý – ońaı sharýa emes. Mundaı sátterde volonterlerdiń kómegi – úlken tirek. Búgingi jastardyń qoǵamǵa qurmetpen qarap, janashyrlyq tanytyp júrgeni kóńilge úmit uıalatady. Igi is arqyly jas býyn qazir adamgershiliktiń bıik úlgisin kórsetip otyr. Sondyqtan barsha eriktilerge shynaıy rızashylyǵymdy bildiremin, – dedi elorda turǵyny Sveta esimdi qarııa.
Osylaısha, qarttar alǵysyn jaýdyryp, jastarǵa sháı men táttisin usyndy. Bir jaǵynan bul – halyqtyń osal toptaryn qoldaý amaly ári áleýmettik jaýapkershilikti damytý tetigi.
Negizinen mundaı ıgi ister «Taza Qazaqstan» aýqymdy ekologııalyq aksııasy aıasynda dástúrli túrde jalǵasyp keledi. Osy joly ıdeıany 15 volonter qoldap, elordalyq jastar arasynda meıirimdilik pen belsendi azamattyq ustanym mádenıetin keńinen nasıhattaýǵa tyrysty.
– Naqty «Qamqorlyq mekenjaıy» aksııasyn turaqty túrde ótkizemiz. Onyń maqsaty – jeke sektorda jalǵyz turatyn zeınetkerlerge qar kúrep, qadam basar joldaryn ashyp, otyndaryna kómek kórsetý. Baıqońyr aýdanyndaǵy úlken kisilerge kómektestik, olardyń alǵysy men jyly lebizi bizge kúsh-qýat berdi. Bul jumysty kóktemge deıin úzdiksiz jalǵastyramyz, – dedi «Astana jastary» volonteri Darıa Oleınıkova.
Aıta keteıik, elimizdegi «Meıirimdi Qazaqstan» áleýmettik aksııasy óz máresine jetti. Bul bastama da qoǵamdaǵy qoldaý mádenıetin nyǵaıtýǵa, áleýmettik jaýapkershilikti arttyrýǵa jáne jastardy ıgi isterge tartýǵa baǵyttaldy. О́tken jyldyń aıaǵynda on kún boıy respýblıkanyń barlyq óńirindegi jastar uıymdary men volonterler qaıyrymdylyq is-sharalaryn ótkizdi.
Naýqannyń ár kúni belgili bir taqyrypqa arnaldy. Atap aıtsaq, jalǵyzilikti zeınetkerlerge kómek kórsetý, qarttar úıi men balalar úıine qoldaý bildirý, medısınalyq mekemelerde donorlyq aksııalar uıymdastyrý, az qamtylǵan otbasylarǵa kómek berý, sondaı-aq kommýnaldyq qyzmet salasy qyzmetkerlerin qoldaý boıynsha jobalar júzege asty. Jalpy 10 myńǵa jýyq azamat qatysty.
