Sýret «Egemen Qazaqstannyń» arhıvinen alyndy
Saýda jáne ıntegrasııa mınıstrligi 2025 jyly sement pen portlandsement klınkerin óndirýdiń tehnologııalyq reglamentine qoıylatyn talaptardy aıqyndaıtyn ulttyq standartty bekitken edi. Mınıstrliktiń habarlaýynsha, sement ónimderiniń sáıkestigin rastaıtin rásimder men onyń tehnologııalyq úderisterine sıpattama beretin biryńǵaı tásilder engizilgen. Osylaısha, sement ónimderin sertıfıkattaýdyń ulttyq júıesin jetildirýdiń arqasynda sala buryn-sońdy bolmaǵan rekordtyq kórsetkishke qol jetkizgen.
Ulttyq standart «Sáıkestikti baǵalaý. Sement pen portlandsement klınkeriniń sáıkestigin rastaý tártibi» talaptaryn eskere otyryp ázirlengen. Bul qujat sementterdi sertıfıkattaý qaǵıdalaryna sáıkes keledi, memlekettik standarttar talaptarymen de úılesedi.
«Sement ónerkásibi – qurylys salasynyń negizgi bazalyq sektorlarynyń biri jáne eldiń ınfraqurylymdyq damýyna tikeleı áser etedi. О́ndiriletin sementtiń sapasy men turaqtylyǵy tehnologııalyq prosesterdiń qatań saqtalýyna tikeleı baılanysty. Standarttalǵan tehnologııalyq reglamentti engizý óndiristi júıeleýge, tehnologııalyq prosesterdiń basqarylýyn kúsheıtýge ári ónim sapasynyń turaqty deńgeıin qamtamasyz etýge múmkindik beredi», delingen mınıstrlik habarlamasynda.
Ulttyq standartty qabyldaý osy salanyń damýyna kedergi keltirip kelgen birqatar júıeli máseleni sheshýge yqpal etken. Atap aıtqanda, tehnologııalyq reglamentterdiń mazmuny men rásimdelýine qoıylatyn normatıvtik talaptardyń bolmaýy, ónim sapasyna, energııa tıimdiligine, ekologııalyq qaýipsizdikke qoıylatyn talaptardyń kúsheıýi, sondaı-aq óndiristik táýekelderdi tómendetý qajettiligi – osy qujatty ázirleýge basty sebep bolǵan.
Bul tehnologııalyq reglament sement pen portlandsement klınkeriniń sáıkestigin rastaý rásimderinen ótý kezinde mindetti túrde usynylatyn qujat bolyp esepteledi. «Ulttyq standartty engizýdiń ekonomıkalyq tıimdiligi kóp. Bul óndiristik prosesterdiń turaqtylyǵyn arttyryp, ónim sapasynyń birkelkiligin saqtaýǵa, otandyq sement ónimderiniń sapasyn arttyrýǵa múmkindik beredi», deıdi mınıstrlik ókilderi.
Sáıkestikti baǵalaý júıesin damytý tájirıbesi qazirdiń ózinde óziniń tıimdiligin is júzinde dáleldepti. 2019 jyly ST RK 3361-2022 ulttyq standarty engizilgennen keıin elimizde jasyryn ımport kólemi aıtarlyqtaı qysqaryp, sement óndirisiniń kórsetkishteri rekordtyq deńgeıge jetken. Salanyń byltyrǵy tarıhı jetistigi – sonyń bir dáleli.
«Jańa ulttyq standartty engizý sement ónimderiniń sapasyn baqylaýǵa da septigin tıgizbek. Saladaǵy ádil básekelestikti ornyqtyryp, otandyq óndiristiń turaqty ósýin qamtamasyz etedi.
Sement ónerkásibi bul standartty engizýge is júzinde tolyq daıyn», deıdi mınıstrlik. Jańa standart óndirýshilerge de asa qıyndyq týǵyzbaıtynyn málimdegen mınıstrlik ónerkásiptiń damýyna baılanysty jumystar ári qaraı da jalǵasyn tabatynyn jetkizdi.
