Onyń ultymyzdyń ónerine degen qyzyǵýshylyǵy Túrkııa jerinde bastalypty. Stýdent kezinde Osman ımperııasynyń tarıhyna qyzyqqanyn aıtady. Sol sebepten de Akıra 2015 jyly Túrkııanyń Ystanbul qalasyna at basyn burady. Osy saparynda dombyramen tanysady. Ǵasyrlar boıy bir halyqtyń únin, ańsary men armanyn álemge jetkizgen qońyr dombyranyń úni júregine óshpes áser syılaıdy. «Birde Ankarada japon tilin jaqsy biletin bir jigittiń úıinde qonaqta boldym. Dastarqan basynda úı ıesi meniń qurmetime arnap kúı shertip berdi. Sol sátte dombyranyń ǵajap úni meniń qulaǵymda tunyp turdy. Buǵan deıin túrli mýzykalyq aspaptarda oınap kórgen edim, alaıda dombyranyń úni júregime buryn-sońdy bolmaǵan syr qaldyrdy», deıdi aǵynan jarylyp.
Sodan bastap Kúnshyǵys eliniń týmasy Akıra dombyra úırenýge bel býady. Izdengen adamǵa bári múmkin eken ǵoı. Kóp ótpeı ol baıqaýlarda dombyrashy retinde óner kórsete bastaıdy. 2017–2021 jyldar aralyǵynda Ystanbulda konserttik sahnalarǵa dombyramen shyǵady. Sonymen qatar fılmder men teleserıaldarǵa da tústi. Onyń kúı oryndaý máneri men dombyrany túrkilik keńistikpen baılanystyrýy tyńdarman nazaryn birden aýdardy. 2021 jyly elimizde ótken etnostyq aspaptar oryndaýshylarynyń III Halyqaralyq «Jas tolqyn» baıqaýynda ol dombyra atalymy boıynsha Gran-prı ıegeri atandy. Bul jeńis onyń óner jolyndaǵy mańyzdy beleske aınaldy. Keıin onyń oryndaýyndaǵy kúıler áleýmettik jelilerde keńinen taralyp, túrli telebaǵdarlamaǵa qatysýyna jol ashty. Tanymal kúıshi Seken Turysbekovpen birge «Aqjaýyn» kúıin oryndap, óz qabiletin kásibı kúıshige baǵalatty. Sondaı-aq áıgili noǵaı ánshisi Arslanbek Sultanbekovpen bir sahnada óner kórsetip, túrki halyqtarynyń rýhanı birligin mýzyka arqyly áıgiledi.
