Foto: Almaty qalasy ákimdigi
Taýdyń jaqyndyǵy – basty artyqshylyǵy
Joba týrıster sanyn birkelki retteýge, tabıǵı ekojúıege túsetin salmaqty azaıtýǵa jáne taý baǵyttaryndaǵy qaýipsizdik deńgeıin arttyrýǵa múmkindik beretin zamanaýı, basqarylatyn ınfraqurylym qurýdy maqsat etedi.
Almaty qalasy Týrızm basqarmasynyń basshysy Ǵalııa Toqseıitovanyń aıtýynsha, taýdyń jaqyndyǵy qalanyń basty básekelestik artyqshylyǵy.
«Almaty taýly aýmaq qala ortalyǵynan nebári 20-30 mınýttyq jerde ornalasqan álemdegi sanaýly megapolısterdiń biri. Bul jetekshi taý týrıstik baǵyttaryn qalyptastyrýǵa, týrızmdi turaqtylyq pen tabıǵatqa janashyrlyqpen qaraý qaǵıdattaryna súıene otyryp damytýǵa zor múmkindik beredi», dedi Ǵ.Toqseıitova.
Ekonomıkalyq turǵydan asa mańyzdy
Týrızm basqarmasynda búginde týrıstik sala jahandyq jalpy ishki ónimniń 10 paıyzyna deıin úles qosatyny, al ınfraqurylymǵa salynǵan árbir dollar 15 dollarǵa deıingi jıyntyq ekonomıkalyq tıimdilik ákeletini aıtyldy. Taý shańǵysy týrızmimen aınalysatyn bir týrıstiń ortasha táýliktik shyǵyny shamamen 350 dollar. Bul taý týrızmin damytý Almaty úshin ekonomıkalyq turǵydan asa mańyzdy baǵyt ekenin kórsetedi.
Sonymen qatar, týrıster sanynyń ósýi taýly aýmaqtarǵa aıtarlyqtaı júkteme túsirip otyrǵany da aıtyldy. 2018 jyldan beri Ile-Alataý ulttyq saıabaǵyna kelýshiler sany 4,5 esege artsa, «Shymbulaq» taý kýrortyna kelýshiler sany 2,5 esege ósip, jylyna 1,5 mıllıon adamǵa jetken.
Almaty taýlarynda úsh adam joǵaldy: bir adamnyń máıiti tabyldy
Barlyq jobalyq sheshim qoǵamdyq talqylaý arqyly
Eske salaıyq, Almaty taý klasterin damytý men «Shymbulaq» kýrortyn jańǵyrtý buǵan deıin Memleket basshysy tarapynan týrızmdi damytýdyń basym baǵyttarynyń biri retinde aıqyndalǵan.
Almaty taý klasteri jyl boıy jumys isteıtin kóp maýsymdy týrıstik ónim retinde damyp otyr: qysta – taý-shańǵy týrızmi, jazda – haıkıng, ekologııalyq soqpaqtar men velosıped baǵyttary. Aýmaqtyń edáýir bóligi kez kelgen jan úshin qoljetimdi kúıinde qalady. Barlyq jobalyq sheshim ekologııalyq talaptardy saqtaı otyryp jáne qoǵamdyq talqylaý arqyly júzege asyrylady.
