foto:depositphotos.com
«QazMunaıGaz» ulttyq kompanııasynyń enshiles kásiporny – «Qazaqteńizkólikfloty «Ulttyq teńiz keme qatynasy kompanııasy» JShS (QTKF) munaı tasymaldaý úshin Matilda tankerin jaldaǵan. Kemeni KQK termınalynda 18 qańtar kúni tıeý josparlanǵan bolatyn. Alaıda 13 qańtarda tanker ushqyshsyz ushý apparattarynyń shabýylyna ushyrady.
«Shabýyl saldarynan órtsiz jarylys boldy. Ekıpaj músheleri arasynda zardap shekkender joq. Aldyn ala baǵalaý boıynsha keme júzýge jaramdy, bastapqy tekserý kezinde eleýli konstrýksııalyq zaqym belgileri anyqtalǵan joq. Qazirgi ýaqytta keltirilgen shyǵyn kólemi anyqtalyp jatyr», delingen «QazMunaıGaz» habarlamasynda.
Sondaı-aq Lıberııa týy astynda júrgen Delta Harmony tankeri de júk tıeýdi kútý rejıminde turǵan kezde ushqyshsyz apparattardyń shabýylyna ushyraǵan.
«Oqıǵa nátıjesinde órt shyqqan, ol jedel túrde sóndirildi. Ekıpaj músheleri zardap shekken joq. Jedel shtabtyń málimetinshe, oqıǵa bolǵan sátte kemege munaı tıeý jumystary áli bastalmaǵan, júk kemeleri bos bolǵan. Osyǵan baılanysty Qazaqstannyń eksporttyq resýrstaryna zııan keltirilgen joq», dep atap ótti Energetıka mınıstrliginde.
Energetıka mınıstrligi logıstıkalyq tizbekterdiń qaýipsizdigin jáne eksporttyq jetkizilimderdiń úzdiksizdigin qamtamasyz etý maqsatynda «QazMunaıGaz» ulttyq operatorymen, konsorsıým ákimshiligimen jáne keme ıelerimen jedel rejımde ózara is-qımyl júrgizip jatyr.
Aıta keteıik, 29 qarashada Astana ýaqytymen 06:06-da Novorossıısk porty aýdanynda KQK-nyń teńiz ınfraqurylym nysandaryna ekıpajsyz júzý quraldary arqyly shabýyl jasalǵan edi. Nátıjesinde teńizdegi qashyqtaǵy aılaq qondyrǵysy VPÝ-2 (qalqymaly tıeý qurylǵysy) aıtarlyqtaı zaqymdaldy. Ermek Kósherbaev KTK-ǵa jasalǵan shabýyldy Ýkraına tarapymen talqylady. Energetıka mınıstri Erlan Aqkenjenov KTK-ǵa tolyqqandy balama joq ekenin, al ózge baǵyttar tek júktiń belgili bir bóligin ǵana tasymaldaı alatynyn aıtqan edi. Sonymen qatar Májilis depýtaty Aıdos Sarym áleýmettik jelilerde Kaspıı qubyr konsorsıýmynyń termınalyna jasalǵan shabýyldy qoldaǵan azamattardy jaýapqa tartýdy talap etti.
