Is-sharaǵa memlekettik organdardyń ókilderi, Parlament depýtattary, ǵylymı qaýymdastyq músheleri, agrarlyq kásiporyndardyń basshylary, qoǵam qaıratkerleri, sondaı-aq professor-oqytýshylar quramy men stýdentter qatysty. Sonymen qatar is-sharaǵa Ivan Adamulynyń kýrstastary qatysyp, stýdenttik jyldardy eske aldy. Bul bastamanyń ýnıversıtet pen onyń túlekteri úshin mańyzdylyǵyn atap ótti.
Is-shara aıasynda jańa býynǵa arnalǵan Smart-aýdıtorııa saltanatty túrde ashyldy. Zamanaýı mýltımedııalyq tehnologııalar jáne sıfrlyq oqytý elementterimen jabdyqtalǵan bul bilim berý keńistigi stýdentterdiń ushqyr oılaý qabiletin qalyptastyrýǵa, praktıkalyq daǵdylaryn damytýǵa jáne zııatkerlik áleýetin arttyrýǵa baǵyttalǵan. Aýdıtorııa bilim berýdiń sıfrlyq transformasııasy talaptaryna tolyqtaı saı keledi.
Saltanatty rásim barysynda Ivan Saýerdiń ýnıversıtetti damytýǵa qosqan úlesine erekshe nazar aýdaryldy. Qoǵamdaǵy belsendiligi jáne mesenattyq qyzmetimen tanymal ol kóptegen jyldar boıy bilim berý salasyndaǵy bastamalardy qoldap keledi. Ataýly aýdıtorııanyń ashylýy – onyń týǵan ýnıversıtetiniń ınfraqurylymyn damytýǵa, stýdentter men oqytýshylar úshin qolaıly ári tehnologııalyq bilim berý ortasyn qalyptastyrýǵa baǵyttalǵan ıgi isteriniń jalǵasy.
Ýnıversıtet Basqarma Tóraǵasy – Rektor, UǴA akademıgi Qanat Maratuly Tireýov óz sózinde Ivan Saýer tulǵasynyń ýnıversıtet pen el úshin aıryqsha mańyzyn atap ótti.
«Bizdiń ýnıversıtet úshin Ivan Saýerdiń S. Seıfýllın atyndaǵy Qazaq agrotehnıkalyq zertteý ýnıversıtetiniń kórnekti túlegi ári qurmetti professory ekeni erekshe qundy. Ol ǵylym men bilimniń mańyzyn árdaıym alǵa qoıady. Bul aýdıtorııa – jaı ǵana oqý orny emes, stýdentterdi eńbekqorlyqqa, jaýapkershilikke jáne týǵan jerge degen súıispenshilikke tárbıeleıtin shabyt mekeni», dedi rektor.
Saltanatty sharanyń jalǵasy retinde Ivan Adamuly Saýer «Agrarlyq bıznesti basqarý tájirıbesi jáne aýyl sharýashylyǵynyń ornyqty damýy» taqyrybynda ashyq dáris oqyp, tájirıbesimen, basqarýshylyq kózqarasymen bólisti.
Ataýly Smart-aýdıtorııanyń ashylýy ýnıversıtettiń materıaldyq-tehnıkalyq bazasyn nyǵaıtýǵa jáne agrarlyq sala úshin ýaqyt talabyna saı, básekege qabiletti mamandar daıarlaýǵa baǵyttalǵan mańyzdy qadam boldy.
