Qorǵanys mınıstrliginiń habarlaýynsha, bul jalaqynyń kóterilýi áskerı qyzmetkerlerdiń aqshalaı qamtamasyz etilýin arttyrýdyń ekinshi kezeńi bolmaq. Alǵashqy kezeń 2025 jylǵy 1 qańtardan bastap júzege asyryldy. Ofıserlik quramnyń jalaqysy orta eseppen 20,3%, al qatardaǵy jáne serjanttyq quramnyń jalaqysy 33,9% ósken.
«2025 jyl Qazaqstan áskerı qyzmetkerlerin áleýmettik qamtamasyz etý júıesindegi ózgeristerge eń baı jyldardyń biri boldy. Qabyldanǵan sharalar aqshalaı qamtýdy, turǵyn úı máselelerin, bilim berýdi, otbasylardy qoldaýdy jáne qyzmet aıaqtalǵannan keıin azamattyq ómirge beıimdelýdi qamtydy. Buǵan deıin joıylǵan dalalyq tólemder júıesi qaıta qalpyna keltirildi. 1 shildeden bastap áskerı qyzmetkerlerge dalalyq shyǵýlarǵa, teńiz joryqtaryna jáne oqý-jattyǵýlarǵa qatysqan ár táýlik úshin issapar shyǵyndaryn rásimdemeı, 1,2 AEK mólsherinde dalalyq tólemder qaıta tólene bastady», dep atap ótti Qorǵanys mınıstrligi.
2025 jylǵy 17 qarashadan bastap «Otbasy bank» turǵyn úı tólemderin alatyn áskerı qyzmetkerlerge arnalǵan arnaıy ıpotekany iske qosty. «Áskerı baspana» baǵdarlamasy ekinshi naryqtan turǵyn úı satyp alýǵa baǵyttalǵan. Baǵdarlama sharttaryna sáıkes, bastapqy jarna 20%, al aldyn ala beriletin qaryzdyń paıyzdyq mólsherlemesi jylyna 18%. Turǵyn úı baǵasynyń 50%-y jınaqtalǵan jaǵdaıda bul mólsherleme 5%-ǵa deıin tómendeıdi.
«Naýryz áskerı» baǵdarlamasy bastapqy jarnasyz jańa turǵyn úıden páter satyp alýǵa múmkindik beredi. Nesıe somasynyń eń joǵary mólsheri Astana men Almaty qalalarynda 36 mıllıon teńgege deıin, basqa óńirlerde 30 mıllıon teńgege deıin, al bastapqy jarna 20%-dan asqan jaǵdaıda 80 mıllıon teńgege deıin jetedi. Qaryzdyń paıyzdyq mólsherlemesi jylyna 9%-ǵa teń.
Sonymen qatar myńnan astam áskerı qyzmetkerdiń balalary «Baldáýren» balalardy saýyqtyrý ortalyǵynda demalyp, densaýlyǵyn nyǵaıtty. Bul Qorǵanys mınıstrliginiń áleýmettik saıasatynyń mańyzdy bóligine aınaldy.
Sarbaz 2.0 sıfrlyq jobasy iske qosylǵannan beri 9 myńnan astam úzdik áskerı qyzmetker bilim berý granttaryna ıe boldy. Olardyń ishinde 3 myńnan astamyna jataqhanada basymdyq beriledi, atap aıtqanda, shákirtaqy tóleý, memlekettik granttar qarastyrylǵan.
Áskerı qyzmetke jaramdylyq dárejesi týraly anyqtamany onlaın alýǵa bolady
20 myńnan astam merzimdi áskerı qyzmetker jalpy somasy shamamen 8 mıllıard teńge bolatyn «nesıelik demalystardy» paıdalandy. Sonymen qatar qyzmet barysynda sarbazdar eńbek naryǵynda suranysqa ıe jumysshy mamandyqtaryn tegin meńgere alady. Atap aıtqanda, aýyr júk kólikteriniń júrgizýshisi, ekskavatorshy, baılanys mamany, dızelshi-elektrık, paramedık sııaqty mamandyqtar bar. Oqý aıaqtalǵan soń resmı sertıfıkattar tabystalady.
Zeınetke shyǵar aldyndaǵy áskerı qyzmetkerlerdi beıimdeý maqsatynda áskerı joǵary oqý oryndarynyń bazasynda olar mektepterde alǵashqy áskerı daıyndyq páninen sabaq berý úshin, sondaı-aq keıin áskerı kafedralarda jumysqa ornalasý maqsatynda tegin qaıta daıarlaýdan óte alady. Bul sheshim ofıserlerdiń kásibı áleýetin saqtaýǵa jáne olardyń azamattyq qyzmetke birtindep kóshýine múmkindik beredi.
Sondaı-aq elimizdegi áskerı qyzmetkerlerdiń kúndelikti azyq quny 3 150 teńgege deıin ósti.
«2026 jyly 1 qańtardan bastap Qarýly kúshterde jalpy áskerlik azyq-túliktiń quny 900 teńgege artty jáne qazir táýligine 3 150 teńge tólenedi. 2025 jylǵy tamyzda Respýblıka bıýdjettik komıssııasy azyq-túlik sebetiniń quramyn jáne qazirgi naryqtyq jaǵdaıdy eskere otyryp qosymsha qarajat bólýge maquldandy», dep málimdedi Qorǵanys mınıstrligi.
