Foto: Ashyq derekkóz
Oqý-aǵartý mınıstri Juldyz Súleımenova mektep dırektorlaryn taǵaıyndaý júıesine ózgeris engizý qajettigin málimdedi. Mınıstrdiń pikirinshe, dırektorlar bastapqyda 2 oqý jylyna taǵaıyndalyp, eger jumysy naqty nátıje kórsetse ǵana taǵy 2 jylǵa uzartylýy tıis. Osylaısha bir basshynyń mektepti basqarý merzimi 4 oqý jylynan aspaýy qajet.
Mınıstr bul bastamany jýyq arada resmı buıryqpen bekitý kózdelip otyrǵanyn jetkizdi.
«Dırektor eki oqý jylyna taǵaıyndalýy kerek. Sol kezeńde mekteptegi bilim sapasy jaqsaryp, oqýshylardyń bilim deńgeıi artsa, qaýipsizdik talaptary saqtalyp, muǵalimderdiń kásibı áleýeti kóterilse, onda onyń qyzmetin taǵy eki jylǵa uzartýǵa bolady», dedi mınıstr.
Juldyz Súleımenovanyń aıtýynsha, sońǵy ýaqytta muǵalimder tarapynan dırektorlardyń basqarý ádebine, qyzmettik ókilettigin asyra paıdalanýyna qatysty shaǵymdar jıilegen.
«Mektep dırektory oqý prosesin uıymdastyrýshy ǵana. Ol ózi de bilikti ustaz bolýy qajet», dedi vedomstvo basshysy.
